(యం. దేవదాసు అయ్యగారి ఉపదేశములు)
త్రియేక దేవుని స్తుతి
తండ్రికిని, కుమారునికిని, పరిశుద్ధాత్మకును ఆదియందును ఇప్పుడును, ఎల్లప్పుడును యుగా యుగములందు ఉండునట్లు మహిమ, మహామహిమ, ఘనత, కీర్తి ప్రభావములు ఆయనకే చెల్లునుగాక!
దైవలక్షణముల స్తుతి
- 1. దేవా! నీవు అనాది వ్యక్తివైయున్నావు. నిన్ను ఎవ్వరు కలుగజేయలేదు. నీయంతట నీవే ఉన్నావు గనుక నీకు వందనములు.
- 2. దేవా! నీవు వెలుగైయున్నావు. అందుచేతనే సూర్య, చంద్ర, నక్షత్రములకు వెలుగునిచ్చినావు. జీవులలో కండ్లకు వెలుగు నిచ్చినావు. గనుక నీకు స్తోత్రములు.
- 3. దేవా! నీవు జ్ఞానమైయున్నావు. అందుచేత దేవదూతలకు, మనుష్యులకు, జీవరానులకు జ్ఞానమిచ్చినావు. అట్టి జ్ఞానము వలన అనేక మర్మములు తెలియుచున్నవి. మా జ్ఞానమునకు నీవు బైలుపడినావు గనుక నీకు స్తుతులు.
- 4 దేవా! నీవు ప్రేమవైయున్నావు. గనుక జీవరాసులు ఒకదానినొకటి ప్రేమించుకొనుచున్నవి. అలాగుననే మనుష్యులుకూడ ఒకరినొకరు ప్రేమించు కొనుచున్నారు గనుక నీకు స్తుతులు.
- 5. దేవా! నీవు న్యాయమై యున్నావు. గనుక నీవు క్షమించేవాడవు. అయినప్పటికిని తప్పుచేసినవారిని శిక్షించి, క్షమించేవాడవు గనుక నీకు ప్రణుతులు.
- 6. దేవా! నీవు పరిశుద్ధుడవైయున్నావు. అందుచేత లోకములో పాపమున్నప్పటికిని పరిశుద్ధతకూడ ఉన్నది. వర్ష జలములలో, కాయలలో పరిశుభ్రత కనబడుచున్నది. మనుష్యులలో పాపమున్నప్పటికిని పరిశుద్ధతకూడ ఉన్నది గనుక నీకు నమస్కారములు.
- 7. దేవా! నీవు శక్తివైయున్నావు. కాబట్టి మానవులకు, జీవరాసులకు శక్తి యిచ్చినావు. గనుక వారు నడువగలరు, పనిచేయగలరు, గనుక నీకు మంగళ స్తోత్రములు.
- 8. దేవా! నీవు సర్వవ్యాపివై యున్నావు. అందుచేతనే అన్నిచోట్ల నీ ప్రభావము అనగా ప్రేమ, జీవము, పరిశుద్ధత నీ పని, నీ కాపుదల కనబడుచున్నది. గనుక నీకు నిత్యమంగళ స్తుతులు.
- 9. దేవా! నీవు నిరాకారుడవైయున్నావు. అందుచేతనే పాపులమైన మాకు కనబడవు. కనబడని తండ్రివి అయినప్పటికిని దర్శనములలో కొందరికి, స్వప్నములలో కొందరికి కనబడుచున్నావు. గనుక నీకు హృదయపూర్వక వందనములు.
- 10. దేవా! నీవు స్వతంత్రుడవైయున్నావు. స్వేచ్చాపరుడవైయున్నావు. నీకు ఎవ్వరును సలహానియ్య నక్కరలేదు. అన్నియు నీ ఇష్టప్రకారమే చేయగలవు. గనుక నీకు హృదయపూర్వక వందనములు.
దేవా! నీయొక్క దివ్య లక్షణములు దేవదూతలకు, మనుష్యులకు ఇచ్చినావు. గనుక స్తోత్రములు. దేవదూతలలో ఒక దూత పాపములో పడి నీ సద్గుణములు లేకుండ చేసికొన్నది. అలాగే మనుష్యులు పాపములోపడి నీ గుణములు చాలావరకు పోగొట్టుకొనుచున్నారు. అయినను నీవు వారియెడల దీర్ధశాంతము కలిగి యున్నావు. గనుక నీకు వందనములు. మరియు ఓ దేవా! నిన్ను అడిగే వారికి నీ శక్తులు దయచేయుదువు. గనుక నమస్కారములు. దేవా! నీ ప్రియకుమారుడైన యేసుక్రీస్తును లోకమునకు పంపించి ఆయనలో నీ గుణములు బయలుపర్చినావు. గనుక నీకు అనేక స్తుతులు. మరియు దేవా! సృష్టిలోని వస్తువులను పరీక్షించిన నీ సుగుణములు అందులో ఉన్నవి గనుక నీకు స్తుతులు. మరియు దేవా! నిన్ను నమ్మినవారిలో నున్న దుర్గుణములు దూరముగా తీసివేసి, మోక్షమునకు చేర్చుకొనుచున్నావు. అక్కడ శాశ్వతముగా వారు నీ దివ్యలక్షణములను అనుభవిస్తున్నారు. గనుక నీకు మంగళ స్తోత్రములు.