గ్రంథకర్త: ఫాదర్. ముంగమూరి దేవదాసు

నోవహునావ - క్రైస్తవ నీతివిశ్వాసము


“అప్పుడు యెహోవా ఓడలో అతని (నోవహును) మూసివేసెను” (ఆది. 7:16)


దేవుని మాట చొప్పున ఆయన తీర్పు దినమున జలప్రళయము భూమిమీదకి వచ్చినప్పుడు నోవహు ఓడప్రక్కన నీరు, అడుగుననీరు, పైన నీరుగలదు. ఈలోకములో క్రైస్తవుని బ్రతుకుకూడ ఆలాగే యుండును. చుట్టును ఆపదలతో నిండియుండును.

వీటిని పైనుండి పడు జలధారకు సరిపోల్చవచ్చును. మనకు బుద్ధి చెప్పుటకు మనలను సరిజేయుటకు దేవుడు వీటిని రానిచ్చును.


దేవుడు నోవహును ఓడలోనికి “రమ్ము” (come) అని పిలిచి తలుపులు మూసివేసెను. అనగా దేవుడు ఆ ఓడలో నున్నాడు. అందులో ఉండి నోవహును పిలిచెను. విశ్వాసి జీవితములో కూడ బహిరంగ శరీరమునకే ప్రభువు శ్రమలు పంపించును. అంతరంగములో ప్రభువు ఉండును. గనుక విశ్వాసి భయపడడు. ప్రభువు ఆపదలను విశ్వాసి లోపలికి ప్రవేశింపనియ్యడు. గనుక విశ్వాసి భయపడనక్కరలేదు. దేవుడు మనకు అన్ని సదుపాయములిచ్చి, తుదకు రక్షణకూడ ఇచ్చినను మనుష్యునికి ఇంకను సందేహమే. మనిషి వృద్ధిలోనికి రాకపోవడమునకు కారణము భయము. ఎన్ని కష్టములున్నను ప్రభువు మన చెంత నున్నాడు అను దృష్టి మానవుడు కలిగియుండవలెను. ఆయన లేకుండ విశ్వాసిని ఎప్పుడు ఒంటరిగా కష్టములలో నుంచడు. ఓడలోనికి నీరు రాకపోవడమునకు కారణము ఓడకు కీలుపూసి యున్నారు. ఓడలోపల నున్న వారికి కీడు రాలేదు. ఎందుకనగా ప్రభువు వారితో నున్నారు. ఒకవేళ శరీరమునుబట్టి భయము కలుగవచ్చును గాని హానిమాత్రము ఉండదు. సొదొమలో దూతలు లోతును లోపలికి లాగి తలుపువేసిరి. ఎందుకనగా బయట శత్రువులున్నారు. ఆలాగే విశ్వాసికి కష్టముండునుగాని హానిమాత్రము రాదు. మరియు పరలోకమే ఈ నావ అని చెప్పవచ్చును. భూమిమీదనున్న అవిశ్వాసులు నావకు ప్రక్కనున్న నీటితో సరిపోల్చవచ్చును. వీరు సంఘమునకు శత్రువులు, అయితే పెండ్లికుమార్తె 7సం॥ల శ్రమలు రాకముందే, ఆ శ్రమలను చూడకుండనే వెళ్ళిపోవును. ప్రభువు సంఘమును తీసికొనిపోవును.


ఉదా: ఒక గ్రామములో ఇంకను రెండు లేక మూడు దినములకు కలహము వచ్చునని తెలిసి ఆడపిల్ల తండ్రి తన బిడ్డ కలహములో పడకుండ తీసికొనిపోయెను. ఆలాగే 7 ఏండ్లు శ్రమలలో పడకుండ ప్రభువు సంఘమును తీసికొని వెళ్ళును. ఓడ అరారాతు కొండపైకి వెళ్ళి క్రిందికి దిగినరీతిగా పెండ్లికుమార్తె ఎత్తబడి, నూతన యెరూషలేములో ఏడేండ్లు విందులోనుండి తర్వాత వెయ్యేండ్ల పాలనలో బోధ చేయుటకు భూమిమీదికి వచ్చును.


నోవహు 120 సం॥లు ఓడను కట్టుటలోను, దేవునిగూర్చి ఇతరులకు చెప్పుటలోను ఉండెను. దేవుడు 120 సం॥లు ప్రజలు మారుమనస్సు పొందుటకు మాత్రమేకాక నోవహు బాగుగా సిద్ధపడుటకును, గొప్ప విశ్వాసిగా తయారగుటకును ఇచ్చెను. ఆలాగుననే ఇతరుల మారుమనస్సు నిమిత్తమే కాక పెండ్లికుమార్తె బాగుగా సిద్ధపడు నిమిత్తము కూడ ప్రభువు తన రెండవ రాకడ ఆలస్యము చేయుచున్నాడు. నోవహు విశ్వాసియైనను మరింత బలపడుటకు గడువిచ్చిను. ఆలాగే పెండ్లికుమార్తె సంఘ విషయముకూడ జరుగుచున్నది.


నోవహు నీతిపరుడు, నిందారహితుడు, దేవునితో నడచినవాడు. (ఆది. 6:9). ఒక మనిషినిగూర్చి మనమేమి అడుగుదుము. అతను ఎవరు? ఏమి వనిచేయుచున్నాడు? అతడెటువంటివాడు? అని అడుగుదుము. దేవుడు లోకమంతయు పారజూచెను. ఒక్కడయినను మంచివాడు కనబడలేదు. ఒక్క నోవహు మాత్రము నీతిపరుడైయుండెను. దేవుడు ఏదైన గొప్పపని చేయించుటకు ఒక మంచి వానిని ఏర్పరచుకొనును. గాని ఒక్కొక్కప్పుడు చెడ్డవారినికూడ ఆయన ఏర్పరచుకొనును. ఎందుకనగా ఆ గొప్పపని అతనిమీద పెట్టినప్పుడే అతడు మార్పు చెందును.


నోవహు నీతిపరుడు, ఎక్కడ? తన ఎదుట తాను నీతిపరుడు. తన మనస్సాక్షి ఎదుట నీతిపరుడు.


ఉదా:- ఒక దొరగారి దగ్గరనున్న బంట్రోతు బల్లమీదనున్న రూ. 200లు దొంగిలించెను. ఆ బంట్రోతునకు రాత్రంత నిద్రపట్టలేదు. అతనిలో ఇద్దరు మాట్లాడుచుండిరి. ఒకరు ఆ సొమ్ము ఇచ్చివేయుము అని, ఇంకొకడు వద్దు అని, అతడు మరుసటి ఉదయమున ఆ సొమ్ము దొరగారికి ఇచ్చివేసెను. అప్పుడు అతనిలోపల కలహముకూడా ఆగిపోయెను. మనసులో నెమ్మది కలిగెను. ఏ విశ్వాసియొక్క మనస్సాక్షి తన్ను గద్దించుటకు సందులేదో అట్టివారే ఎత్తబడే గుంపులో నుందురు. అనగా తన మనస్సాక్షికూడ తన్ను గద్దింపకుండు స్థితి ఎవరికున్నదో వారే పెండ్లికుమార్తె సంఘములోని వారైయుందురు. రెండవరాకడలోని వారు తమ స్వంత మనస్సాక్షికూడ గద్దించలేనంత పవిత్రమైన, స్థితిలో నుందురు. నోవహు తన మనస్సాక్షి యెదుట నీతిమంతుడు, మనుష్యుల యెదుట నీతిమంతుడు, దేవునియెదుట నీతిమంతుడు. దేవుడు నోవహుతో ఈ తరములో, నీవే నీతిమంతుడవని చెప్పెను.


ఇట్టిస్థితి చదువరులు కలిగియుండు దీవెన ప్రభువు అనుగ్రహించును గాక! ఆమేన్.