4. సంపూర్ణ ఉపవాస అభ్యాసము
గ్రంథకర్త: ఫాదర్. ముంగమూరి దేవదాసు
యెషయా 58:3-8; 1థెస్స. 5:12-24
ఉపవాస దిన ఆసక్తిపరులారా! మాకందరకు సంపూర్ణ ఉపవాస దీవెనలు అందునుగాక! ఆమేన్.
ప్రార్ధన:- భూలోకమందున్న మా తండ్రీ! పరలోకమందున్న మా తండ్రీ! తండ్రి, కుమార, పరిశుద్దాత్మ అను త్రిత్వదేవా! ఇప్పటి మా కూటములో ఉన్న తండ్రీ నీకనేక స్తోత్రములు. సైతానుకుకూడా ఈ కూటమునకు వచ్చుటకు సెలవిచ్చిన తండ్రీ స్తోత్రములు. మేము ఎటువంటి మీటింగులు చేసికొనుచున్నామో, ఆ మీటింగులు సైతాను కూడా చూడవలెను. గనుక నీవు అతనికి సెలవివ్వడము మంచిదే. అతని ప్రయత్నములను, అతని రాజ్యమును పడగొట్టే ప్రయత్నముల నిమిత్తమైన ఈ మీటింగును అతడు అతని సైన్యము చూచుట ముఖ్యము. అలాగే నీ విశ్వాసులు నీ రాజ్యమును వృద్దిచేసే మీటింగులు చూచుటకు దూతలు, పరలోక వాస్తవ్యులుకూడా రావలెను. వారిని కూడా తీసికొని రమ్ము. అలాగే ఎవరికైతే వరమున్నదో అట్టి భూలోక వాస్తవ్యుల ఆత్మలనుకూడా ఇది చూచుటకు తీసికొని రమ్ము. ఎందుకంటే ఈ పని వారుకూడా చూడవలెను.
ఈవేళ ఇక్కడ మీటింగు ఉన్నదని తెలియ జేసినప్పుడు ఎవరికి తెలిసినదో, వారిలో మీకిష్టమైన వారిని తీసికొని రమ్ము నీకిష్టము లేనివారిని రానియ్యవద్దు. తీరా వచ్చిఉంటే మెల్లగా వారిని సాగనంపుము. ఈవేళ నీవు మాకు ఏమి చెప్పనైయున్నావో వాటిని చెప్పుము. వాటిని వినగలిగే మా హృదయ చెవులను విప్పుము, ఆదరించుము. చెవిగలవాడు ఆత్మ సంఘముతో చెప్పేవి వినవలెను గదా. ఇక్కడ ఉన్న చిన్నపిల్లలను, పెద్దవారిని, క్రైస్తవులను, క్రైస్తవేతరులను అందరిని పేరు పేరు చొప్పున దీవించుము. ఈ ప్రార్ధన త్వరగా వచ్చుచున్న మా ప్రభువుద్వారా ఆలకించుము ఆమేన్.
1. కఠినమైన ఉపన్యాసాలు వినేటందుకు వచ్చినట్టి విశ్వాసులారా! వినండి. నా మొదటి ప్రసంగము ఏదనగా ఉపవాసము ఈ సంగతులు మీరు ఇదివరకే ఇతర స్థలములలో, బైబిలులో, సన్నిధి కూటాలలో విన్నారు. కొందరు వినలేదు. సన్నిధి కూటములలో యేసుప్రభువు చెప్పిన వివరణలు అనగా ఉపవాసమునుగూర్చిన వివరములు, ఆ కూటస్తులు నాకంటె బాగా చెప్పగలరు.
- మొదటి ఉపన్యాసము ఉపవాసము గరించి,
- రెండవ ఉపన్యాసము దశమ భాగము గురించి,
- మూడవ ఉపన్యాసము సువార్త ప్రకటనగూర్చి,
- నాల్గవ ఉపన్యాసం సన్నిధి కూటముల స్థాపనగురించి,
- ఐదవ ఉపన్యాసం ప్రభువు రాకడను గురించి.
ఈ ఐదు ఉపన్యాసములును మిక్కిలి అవసరమైనవి.
ఉపవాసము: -
- 1. ఉపవాసము అనగానేమి? ఉపవాస ప్రార్ధన అనగా ఎక్కువ కష్టపడి, చెమట ఊడ్చి పనిచేయుటయే ఉపవాస ప్రార్ధన.
- 2. మామూలు పనులు కట్టివేసి వాటిని ఉపవాస ప్రార్ధనా శాలకు రాకుండాచేయుట.
- 3. తీరిక లేకుండా ఉండుట.
- 4. మీటింగులో కూర్చున్నవారు ఒకరితోఒకరు గుసగుసలాడుట, మాట్లాడుట మానివేసి, ప్రభువు దీక్షతోనే ఉండుట. ఎవరికి ఏమి వచ్చినదని అడుగుకొనుటకూడ మానివేయవలెను.
-
5. వచ్చిన భూతములను బైట నిలువబెట్టి నోరునెత్తి బాదుకొనేటట్లు చేయుట.
ఉదా:- అరణ్యములో ఉన్న త్రాసు పాము అనగా ఎప్పుడూ మనిషిని చూడని త్రాసు పాము మనిషినిచూస్తే తల నేలకు వేసి కొట్టుకొనును. అలాగే ఇటువంటి కూటములు భూతాలు చూస్తే తలనేలకు వేసి కొట్టుకొనును. అట్టి పనిని జరిగించునదే ఉపవాస ప్రార్ధనాదినము. - 6.
- ఎ) అన్నముగాని,
- బి) నీళ్లుగాని,
- ని) బయటకు వెళ్ళవలసిన అవసరాలుగాని ఏమియులేకుండా చేసికొనుటే ఉపవాస ప్రార్ధనాదినము.
-
7.
- ఎ) బీదలకు,
- బి) రోగులకు,
- సి) వృద్ధులకు,
- డి) ఉద్యోగములు లేనివారికి అనగా నిరుద్యోగులకు మన ముద్దలో ఒక ముద్ద ఇచ్చివేయునదే లేక అన్ని ముద్దలు ఆవేళకు ఇచ్చివేయుటయే ఉపవాస ప్రార్థనాక్రమము.
ఇది బైబిలులో ప్రవక్తలు మిక్కిలి స్పష్టముగా వ్రాసినారు. యేసుప్రభువే అటువంటి బీదలు అనగా,
- 1) రోగులు,
- 2) వృద్ధులు,
- ౩) పేదలు,
- 4) ఉద్యోగములేనివారు. మొదలైన వారికి కావలసిన సహాయముచేసి, వారి అక్కరలు తీర్చిరి. ఆలాగే, మనమును వారికి మనము సహాయము చేయుటకు అట్టి సమయము ప్రభువే రప్పిస్తే, అదే ఉపవాస సమయము. వారేకాదు ఇంకా బీదలున్నారు.
- 5) అన్నదాన సమాజపు వారు వచ్చి “అయ్యా మీరు క్రైస్తవులు. మాకేదైన సహాయము ఇయ్యండి” అంటే అప్పుడు మీరు ఇస్తే అది బీదల లెక్కలోనికి వచ్చును.
- 6) మనము భోజనము చేసివేసి పాత్రలన్నీ కడిగివేసిన తర్వాత ఒక కునుకు తీద్దామని
పండుకొన్నప్పుడు, మన
బంధువులుగాని, స్నేహితులుగాని పొరుగు ఊరునుండి పగలు అయినా రాత్రి అయినా మన ఇంటికి వచ్చినపుడు; (బైబిలులో
స్నేహితుడు
రొట్టెలకొరకు సమయము దాటి నిద్రపోయిన తర్వాత అర్ధరాత్రిలో వచ్చినట్లు ఉన్నదికదా!) అట్టి సమయములో బద్దకించక,
విసుగుకొనక
ప్రభువునకు చేసినట్లు భావించిచేస్తే, అది అసలైన అతిధి సంస్కారము. అనగా అవసరమైన వారికి చేయవలెను అదియే ఉపవాసము.
బంధువులు, స్నేహితులు ఆ నిమిషమునకు బీదలైనవారు వీరిలో ఏడు రకపు బీదలున్నారు. అప్పుల పాలైనవారు మీవద్దకు వచ్చి సలాంచేసి, మాకు కాస్త సహాయము చేయండి తర్వాత తీర్చుకొంటాము అని అన్నప్పుడు చేయగలిగినంత సహాయము చేయుటయే ఉపవాసము. దౌర్జన్యము చేయువారును వచ్చి సహాయము అడుగుదురు. కారణము రాకడ దగ్గర పడినది. గనుక అట్టి దౌర్జన్యస్తుల రాకడకూడా దగ్గర పడినది. వారికిని మనము సహాయము చేయాలి. అందుకే ఇట్టి కూటాలు. (అనగా అట్టి శక్తిని సంపాదించుకొనుటకే ఈ కూటములు).
- 8. మనదగ్గర డబ్బు, సరుకు అయిపోయినప్పుడు వారు వస్తారు. అప్పుడు అబ్బాయి నా దగ్గర ఏమిలేదు. నీకెక్కడైన దొరికేటట్లు ప్రార్ధిస్తాను. నా ప్రభువు తప్పక నా ప్రార్ధన వింటాడు. యోహాను. 14:14లో యేసునామమున ఏదైనా వింటాను అని ఉన్నది గనుక అధైర్యపడకు అని అతనిని నిలువబెట్టి ప్రార్ధిస్తే మొదట అతడు నమ్మకపోయినా తర్వాత సమ్మతించి వెళ్లతాడు. ఈ మంగళవారమేకాదు. ప్రతి మంగళవారము ఇట్టికూటములు పెట్టాలి.
-
9. ఇది చాలా భయంకరము. అన్నిటికంటె భయంకరము. మీరు నమ్మరు. వీరు ఆఖరు బీదవారు. అనగా
యేసుప్రభువే
బీదవాని ఆకారముగా వస్తాడు. కుష్టురోగుల ఆకారంలో వస్తాడు ఎందుకనగా, “నరులును, నీవును చేసిన పాపమునుబట్టి, ఇట్టి
జబ్బులు
వచ్చినవని మానవులకు చూపుటకు వచ్చును. ఎప్పుడైనా ప్రభువు అట్టి రూపముతో వస్తే, అట్టి తరుణమును నీవు పోగొట్టుకుంటే,
నీవు
దౌర్భాగ్యుడవును, వట్టి దరిద్రుడవును అగుదువు. నిదానించి చూచిన యెడల అతని కళ్లనుండి అనగా భిక్షకుని కండ్లనుండి
వెలుగు
వచ్చును (ఆ రోగి ప్రభువై ఉంటే) అది అందరికి కనిపించక నీకే కనిపించును. అప్పుడు ఆయన చాటుకు వెళ్ళిపోవును. ఆయన ప్రభువని
నీవు
గుర్తించి, ప్రభువా! నమస్కారము అని చెప్పితే, ఆయన నీ భిక్షము తీసుకోరుగాని అంతర్థానమగుదురు.
మరియొక రకము వారు ఎవరనగా, దౌర్జన్యము చేసేవారు. వీరు వచ్చి మనము తినే కంచాలు దౌర్జన్యముగా లాగుకుంటారు. మీరు ప్రార్ధనలో ఉంటూ ఉంటే అట్టి దౌర్జన్యాలు ప్రభువు మీకు జరుగనివ్వరు (నా మాట మీరు వింటారు. గనుక ప్రార్ధనలో ఉంటారు). అట్టి పేదలను పరిశీలనగా తెలిసికొనుటకు లోపలకు వెళ్లి కాసేపు ప్రార్థించుకున్నట్లయితే వేయవచ్చునా? వేయకూడదా? అను సందేహము తీరిపోవును. అతను నిజముగా బీదవాడయితే వేసేవరకు ఉంటాడు. ఆ వచ్చినవాడు ప్రభువు అయితే నీవు ప్రార్ధించుకొనునప్పుడు వెళ్ళిపోతాడు. కొందరు బట్టముక్క (వస్త్రము) అడుగుతారు, కొందరు పెరుగు అన్నము వేయమంటారు, ఇంటిముందే కూర్చుంటారు. జాగ్రత్త, ఈ విషయములు జాగ్రత్త. - 10. మీరు ప్రయాణములో వెళ్ళునప్పుడు ప్రభువుగాని, దేవదూతగాని, పరలోక పరిశుద్దుడుగాని “మీయొద్ద కూర్చుండి, జాలిగా అందరివైపు బహు దీనముగా చూచుచుండును.” అప్పుడు నీవు విశ్వాసివి అయితే ఈ రూపు యేసుప్రభువుదే అని గుర్తించుము. మత్తయి 25అధ్యా॥లో ఉన్నదే మీకు చెప్పుచున్నాను. జాగ్రత్త. రాకడ సమీపించినది గనుక ఇకముందుకు ఇవి జరుగబోవును, నేడునూ కొన్ని జరుగుచున్నవి. జరుగనైయున్నవి గనుక జాగ్రత్త ఈలాగు వీరు 10రకపు బీదలు. మీరు వారికి ఏమైనా ఇస్తే వారు పుచ్చుకొనరు. వద్దులెండి అందురు.
పూనానుండి దౌండు స్టేషనునకు బండి వెళ్ళుచుండగా, దానిలో ఒక పెట్టెలో మిలటరీవారు ఉన్నారు. దానిలో ఒక ఆంగ్లో- ఇండియన్ వలె ఉన్న ఒకవ్యక్తి, వారు స్థలమియ్యనందున బండిలో ఒక మూల నిలువబడి, ఆ బండిలో ఉన్నవారితో, లోకము ఎవరికొరకు కనిపెట్టుచున్నదో మీరు ఎరుగుదురా? అని అడిగి అంతర్థానమై పోయారు.
ఈలాగు ఆయన అనేకమారులు మనలను దర్శించును, పరీక్షించును, అనుభవము నేర్పించును. ఈ చెప్పబడిన సంగతులన్నీ మన అనుభవములో ఉండుటకే ఈ కూటము ఏర్పాటు చేసితిని. ఈ అనుభవములన్నీ క్రీస్తుప్రభువు మీకు నేర్పించి, తగిన కాలము తన దర్శనమిచ్చి, తనను గుర్తించగల్గిన జ్ఞాన ప్రత్యక్షతనిచ్చి, వివేకమును వెలిగించి, తన మహిమలో మిమ్ములను స్థిరపర్చుకొనునుగాక. ఆమేన్