జ్ఞాతవ్యము 7: Father M. Devadas

---

సంస్కారపు సహవాసము

సామెతలు 9:4-6; లూకా 14:16-24; 1కొరింధీ 11:23

నేను మీకు అప్పగించిన దానిని ప్రభువు వలన పొందితిని. ఈ అనుభవము ఏర్పరచబడినవారికే తన పిలుపు నంగీకరించే వారికే, తన సహవాసము కోరేవారికే ఆయన ఇవ్వగలరు.

ప్రభువే స్వయముగా ఈ సంస్కారమును పౌలుగారికిచ్చారు. చివరిరాత్రి మేడగదిలో ప్రభువు నూతన నిబంధన ఇచ్చారు. 12 మంది శిష్యులతో ఆ మేడ గదిలో పౌలుగారు లేరు. కానీ 'నేను ప్రభువు వలన పొందితిని' అని ఆయనే వ్రాసారు.

యోహానుగారు సంఘములకు చట్టమునిచ్చే బాధ్యత పౌలుగారికి ఇచ్చారు. యూదామత ప్రవిష్టుడైన పౌలు ప్రతిదీ ప్రభువు దగ్గరే నేర్చుకొని సంఘములకు చెప్పేవాడు. అలాగే అబ్బాయ్ నేను చివరి రాత్రి 12 మందికి ఇలా ఇచ్చానని పౌలుగారికి ప్రభువే సంస్కారమిచ్చారు. “ప్రభువైన యేసు తాను అప్పగింపబడిన రాత్రి యొక రొట్టెను తీసికొని” ఈ సంగతి పౌలుగారికి తెలియదు. కాని అన్నీ ప్రభువే చెప్పెవారు. పౌలుగారికిచ్చిన ప్రభువు మనకివ్వరా? పౌలుగారికిచ్చిన ప్రభువా! నీవు నాకివ్వవా! నేను నీ బిడ్డను కానా! ప్రియుడవైన నీవిచ్చే విందు నాకు కావాలి. ప్రభువు రాకడ కాలములో మనమున్నాము. నా బిడ్డకు నేనే స్వయముగా ఆహారము పెట్టుకోవాలని తల్లికి ప్రియమైన బిడ్డలపై ఉంటుంది. మనము కోరవలెనేగాని, నీవే నాకివ్వాలని అడిగితే ఇవ్వరా! ఆయన తన గొర్రెలను తన చేతితో మేపును. ప్రతి గురువారము 1గంట సంస్కారము కొరకు కనిపెట్టండి. ఆయన మేపును తప్పక అందుకోగలరు.

• ప॥గీ॥ 1:7లో ప్రాణప్రియుడా! నీ మందను నీవెచట మేపుదువో అని అడిగిన ప్రియురాలికి మాదిరిగా ఉన్న సమరయ స్త్రీకి యోహాను 4:14 జీవజలమిచ్చారు. తన ప్రియుని యొద్ద శరీర రక్తములను భుజించేస్థితి, అంతస్తు ఎంత ఉన్నతమైనదోకదా! ఆత్మ సంబంధమైన విషయములలో మనము కష్టపడము అదే విచారము. గొంగలి పురుగు నిశ్శబ్ధముగా గూడులో ఉండుట వలన ఎంత సౌందర్యముగా బయటకు వస్తుందో! శరీరము ఆత్మకు విరోధము. ఆత్మ శరీరమునకు విరోధము (రోమా 8వ అధ్యాయము). గనుక శరీరము, ఆత్మకు విశ్వాసమును పట్టనివ్వదు. ఈ శరీరమును బాగా నలుగగొట్టుకొంటేనేగాని ఆ ఆత్మ రూపమురాదు. మేఘములోనికి వెళ్ళకముందే ఆయన శరీర రక్తములే మనల్ని ఆయన రూపమునకు మార్చునుగాక. ఆమేన్.


• 2) రక్షణ విందు:- లూకా 14వ అధ్యాయము. ఈ విందును గూర్చి అనేకులకు ఆహ్వానము వెళ్ళినది. విందు సిద్ధపరచినది ప్రభువే. మానవులను రక్షించుటకు క్రీస్తు యేసు ఈ లోకమునకు వచ్చి ప్రాణమిచ్చి, రక్తమిచ్చి తిరిగిలేచి రక్షణ విందుకు సిద్ధపరిచారు. అందరికీ అన్ని కాలములలోని వారికి ఈ రక్షణ విందు ఆహ్వానము వెళ్ళినది.


• 3) పాత నిబంధన సంఘపు విందు:- 40 సం॥లు పరలోకపు మన్నానే భుజించారు ఇశ్రాయేలీయులు. ఇది శరీర సంబంధమైన విందు. శరీరమునకే సరిపోయినది కానీ ఆత్మకు సరిపోలేదు. కాని యేసుప్రభువు లోకమునకు వచ్చి ఇచ్చిన విందు రక్షణ విందు, ఇది అన్ని కాలముల వారికి, అన్ని స్థితులలో ఉన్నవారికి సరిపడిన విందు. గనుక ఈ విందునుగూర్చి ఆయన అన్ని మూలలో ఉన్నవారికి పిలుపునిచ్చారు. అయితే వారు 3 రకముల సాకులు చెప్పిరి. దేవుడంత కష్టపడి రక్షణ విందు తయారుచేస్తే ఆ విలువను ప్రజలు గ్రహించలేదు. మత్తయి 5,6, 7అధ్యాయములు, గాంధీగారికి ప్రియమైనవి, చాలా ప్రియమైనవట. కానీ యేసునెందుకు అంగీకరించలేదు. రక్షణను ఎక్కువగా ఎంచలేదు. గౌరవము నెక్కువగా ఎంచుకున్నారు. ఇదే పొలము కొనుక్కొనుటకు నీకొరకు ప్రాణమునిచ్చిన క్రీస్తు నెక్కువగా ప్రేమించావా! దేశము నెక్కువగా ప్రేమించావా! నీ తీర్మానమేమిటి? రక్షణ విందునందుకొనేవారికి అన్నీ దీవెనలే! నా రాజ్యమును, నా నీతిని మొదట వెదకుడి. నా నామము పేరిట నన్నేమి అడిగిన అన్నీ ఇస్తాను. ఈ లోకములో క్రీస్తుకొరకు శ్రమపడిన వారికి పరలోకములో మహిమ.


• 4) ఏర్పరచబడినవారి విందు:-

  తన శిష్యులైన వారందరినీ ఆయన ఆ గురువారపు రాత్రి పిలిచి విందు అని చెప్పలేడు కాని ఆయనతో సహవాసము గలవారికే ఆ విందు చేసారు. ప్రభువుతో సహవాసము చేస్తున్నారా? లేక ఇతరమైన వాటితో చేస్తున్నారా? ఈ సహవాసము కోరేవారు ఏ సహవాసమును కోరకూడదు. యూదాకి రొట్టె ముక్క ఇచ్చి పంపివేసారు. ధనముతో సహవాసము చేసాడు గనుక విందులోనికి రాలేకపోయాడు. పెండ్లికయితే అందర్నీ పిలుస్తారు. పుట్టిన రోజులకైతే అందర్నీకాదు సొంతవారినే పిలుస్తారు. అలాగే ఆయన సొంతగా పిలుచుకున్నవారికే ఆయన శరీర రక్తము లిచ్చారు. అప్పటికి సిలువకు వెళ్ళలేదు, రక్తము కార్చలేదు. నా శరీర రక్తములు తీసికొనండి అంటే ఎదురు ప్రశ్న వేయలేదు. అంతగా వారాయనను నమ్మారు, ప్రేమించారు. ద్రాక్షారస మెందుకు ఏర్పాటు చేసారు. నోవహు ద్రాక్షతోటవేసి, పండ్లు పిండుకొని త్రాగి మత్తుగా నిద్రపోయాడు. ప్రేమాతిశయముచేత నేను మూర్చిల్లుచున్నాను అని సంఘము పలుకుచున్నది. అందుకే ద్రాక్షారసమును వాడారు. ప్రేమను రుచి చూపించేది, మనల్ని మత్తిల్ల చేసే ద్రాక్షారసము వంటిది, ఆయన ప్రేమ నీ ప్రేమద్రాక్షారసము కన్నా అతి మధురము. ప్రేమను తలంచుకుంటూ, తలంచుకుంటూ మూర్చిల్లి పోయింది పెండ్లికుమార్తె గనుక

  • (1) ప్రేమాతిశయముచేత ప్రియురాలు మూర్చిల్లుటకు,
  • (2) క్రీస్తుయొక్క ప్రేమ మధురమైనది దానిని మనము విడిచి పెట్టకుండుటకు, ద్రాక్షారసమును సాదృశ్యముగా వాడిరి.
  
  
  • 1. ఇశ్రాయేలీయుల పాతనిబంధన విందుల వలన వారి ఆత్మలకేమి మేలు కలుగలేదు.
  • 2. రక్షణ విందులోనివారు రక్షణకొరకు ప్రభువును, రక్షకుడుగానే అంగీకరించారు కానీ శిరస్సుగా అంగీకరించలేదు.
  • 3. శిరస్సుగా అంగీకరించినవారికి ప్రభువుతో ఏకత్వమున్నది. ఏర్పరచబడినవారి విందులోనే ఈ ఐక్యత ఉన్నది. ఆయన మనలోవుండుట ఆయనలోనుండుట, ఇదే ప్రభువుయొక్క సంస్కారములోనున్న బంధము. గనుక నేను ప్రభువు ఒక్కటే అదే ఏకత్వము. అట్టి ఐక్యతతో స్తుతించే హృదయముతో, సంతోషముతో, ఆనందముతో నేను ఆయన ఏకమైనామనే హృదయముతో బల్లయొద్దకు రావలెను.

  మొదటి నెల సంస్కారపు బల్లయొద్దకు రాకపోతే, 11 నెలలు ఆత్మీయ బలము, ఆయుష్షు పోవును. గనుక మనము ఆయనలోను, ఆయన మనలోను ఉండుటకే బల్లయొద్దకు రావాలి.

  
  
  • (1) మోషే నీళ్ళను రక్తముగా మార్చాడు. ప్రజలను చంపాడు కానీ,
  • (2) యేసుప్రభువు "కానా విందులో, నీటిని ద్రాక్షారసముగా మార్చాడు.
  • (3) ద్రాక్షారసమునే రక్తముగా మార్చి మనకు సంస్కారములో ఇచ్చారు. శ్రేష్టమైనది, మనల్ని బ్రతికించేది, శరీరమునకు కావలసినది, ఆత్మకు కావలసినది ఈ సంస్కారములోనే ఉన్నది.

గనుక అట్టి సంస్కారపు విందును పరిశుద్ధముగా ఎంచి, ఘనమైనదిగా మనము ఆచరించిన యెడల ఆయనే స్వయముగా పౌలుగారికిచ్చినట్లు మనకును స్వయముగా వడ్డించి, తినిపించి ఆరోహణబలమిచ్చి ఆయన రాకడలో పాలు మనకు దయచేయును. అట్టి అంతరంగ సంస్కార బలముతో ఆత్మ తండ్రి మనకు నైజముపై బలమిచ్చి జయమిచ్చును గాక! ఆమేన్.