గ్రంథకర్త: ఫాదర్. ముంగమూరి దేవదాసు

1. బైబిలు తరగతి పాఠము

---

(బైబిలులోని 66 పుస్తకములలోనున్న అంశములు)

పాతనిబంధన

1. ఇప్పుడు లోకములో నున్నటువంటి మంచివి అన్నియు దేవుడు మొదట ఎట్లు చేసినాడో అది ఆదికాండములో నున్నది.


2. దేవుని ప్రజలు బానిసత్వమును విడిపించుకొని ఎట్లు బయటికివచ్చినారో అది నిర్గమ కాండములోనున్నది.


3. దేవుని ప్రజలు అరణ్యములో ఎట్లు దైవారాధన చేసిరో అది లేవీయ కాండములో నున్నది.


4. ఆరాధన శాలలో దేవుడు బోధించిన బోధ దేవుని ప్రజలు ఎట్లు వాడుకలో పెట్టిరో అదియును, ఎట్లు సేవచేసిరో అదియును, ఎట్లు తమ జనాంగమును లెక్కపెట్టినారో అదియును సంఖ్యాకాండములో నున్నది.


5. ఇదివరకు బోధించిన బోధలు దేవుడు మోషేద్వార ప్రజలకెట్లు జ్ఞాపకము తెచ్చెనో అది ద్వితియోపదేశ కాండములో నున్నది.


6. దేవుడు తన జనమునకు యెహోషువాద్వార పాలెస్తీనా దేశమును ఎట్లు పంచిపెట్టెనో అది యెహోషువ గ్రంథములో నున్నది.


7. తన ప్రజలు ఎన్నో పర్యాయములు పాపములో పడిపోగా దేవుడు వారిని శిక్షించుచు, ఎట్లు న్యాయాధిపతులద్వారా రక్షించెనో అది న్యాయాధిపతుల గ్రంథములో నున్నది.


8. ఏ అన్యురాలియొక్క వంశములో యేసుప్రభువు జన్మించవలెనో ఆ అన్యురాలైన రూతు అనే భక్తురాలి చరిత్ర రూతు గ్రంథములో నున్నది.


9. దేవుని ప్రజల రాజ్యము ఎట్లు స్థాపింపబడినదో అది మొదటి సమూయేలు గ్రంథములో నున్నది.


10. ఆ రాజ్యములో కొంత పని ఎట్లు జరిగెనో అది రెండవ సమూయేలు గ్రంథములో నున్నది.


11. ఆ రాజ్యము ఎట్లు స్థిరపడెనో అది మొదటి రాజుల గ్రంథములో నున్నది.


12. ఆ రాజ్యము ఎట్లు మహోన్నత స్థితిలోనికి వచ్చెనో అది రెండవ రాజుల గ్రంథములో నున్నది.


13. ఆ రాజ్యముయొక్క చరిత్ర అదివరకున్న చరిత్రకంటె వేరుగా యెహోవా రాజైయున్నాడనునదియును మొదటి దినవృత్తాంత గ్రంథములో నున్నది.


14. ఆ రాజ్యము ఎట్లు కొనసాగెనో అదికూడ వేరే రీతిగా రెండవ దినవృత్తాంత గ్రంథములో నున్నది.


15. చెరలోనుండి తిరిగివచ్చిన వారికి ఎజ్రా ఎట్లు దైవబోధ వినిపించెనో అది ఎజ్రా గ్రంథములో నున్నది.


16. పడిపోయిన దేవాలయము నెహెమ్యా ఎట్లు కట్టించెనో అది నెహెమ్యా గ్రంథములో నున్నది.


17. దేవుడు తన ప్రజలను నరహత్యనుంచి ఎట్లు తప్పించెననో అది ఎస్తేరు గ్రంథములో నున్నది.


18. మానవుడు శ్రమలు అనుభవిస్తేనేగాని దైవభక్తి వెల్లడిలోకి రాదు అని యోబు గ్రంథములో నున్నది.


19. అన్ని విషయములలో నిత్యము దేవునిని ఎట్లు స్తుతించవలెనో అది కీర్తనల గ్రంథములో నున్నది.


20. జ్ఞానము ఎట్లు సంపాదించుకొనవలెనో అది సామెతల గ్రంథములో నున్నది.


21. లోకములో ఉండే సమస్త సుఖములు వ్యర్థమేగాని ఒక్క దైవభక్తిమాత్రమే మానవులకు ఉపయోగకరమని ప్రసంగిలో నున్నది.


22. సంఘమునకు దేవునికిని ఉన్న సహవాసమును గురించి పరమ గీతములో నున్నది.


23. క్రీస్తుప్రభువుయొక్క చరిత్ర యావత్తును ప్రవచన రూపముగా యెషయా గ్రంథములో నున్నది.


24. చెరలోకివెళ్ళిపోగా యెరూషలేములో మిగిలిపోయిన యూదులమధ్యను దైవ చిత్తమును, తీర్పును యిర్మియా వినిపించిన సంగతి యిర్మియా గ్రంథములో నున్నది.


25. శ్రమలోనుండి శ్రమను ఒకరు వివరించిన సంగతి విలాపవాక్యముల గ్రంథములో నున్నది.


26. చెరలోనున్న యూదులకు దేవుని చిత్తమును యెహెజ్కేలు బయలు పరచిన సంగతి యెహెజ్కేలు గ్రంథములోనున్నది.


27. రాబోవు కాలములో అంతి క్రీస్తు పరిపాలన ఉండుననియు, మెస్సీయా లోకమంతటిని ఏలుననియు దానియేలు ప్రవచించిన ప్రవచనములు దానియేలు గ్రంథములో నున్నవి.


28. దేవుని ప్రజలు బ్రష్టులైనందువల్ల దేవుడే స్వయముగా వారికొరకు వార్తపంపి నాయొద్దకు తిరిగి రావలెనని చెప్పినట్టు హోషేయ గ్రంథములో నున్నది.


29. అంత్య దినములయందు దేవుడు తన ఆత్మను అందరిమీద కుమ్మరించునని యోవేలు గ్రంథములో నున్నది.


30. ఇతర జనాంగముల వారికిని దేవుని ప్రజలకును వారి వారి పాపస్థితినిబట్టి శిక్ష లభించుననియు, మార్పు పొందినవారు చేర్చుకొనబడుదురనియు ఆమోసు గ్రంథములో నున్నది.


31. ఎదోము (ఏశావు) తన సహోదరునికి విరోధియైనందున శిక్ష కలుగుననియు, ఇతరులకు అపకారముచేసిన వారికి అపకారము కలుగుననియు ఓబద్యా గ్రంథములో నున్నది.


32. యూదులకు దేవుడు అయియున్న దేవుడు అన్యులకుకూడ దేవుడే గనుక వారికీ సంగతి చెప్పుము అని యోనా గ్రంథములో నున్నది.


33. దేవునివంటి క్షమాపణ కర్త మరియొకరు లేరు అని మీకా గ్రంథములో నున్నది.


34. దైవ ద్వేషకులకు గొప్ప హాని అనియు, పశ్చాత్తాపపడు వారికి ఆదరణ కలుగుననియు నహూము గ్రంథములోనున్నది.


35. దేవుడెందుకు లోకములో కీడు జరుగనిచ్చుచున్నాడో ఆ సంగతియును ఎన్ని కష్టాలున్నను దేవునియందు ఆనందించుట మానకూడదనియు హబక్కూకు గ్రంథములో నున్నది.


36. దేవుడు ఎంత ప్రేమగలవాడైనప్పటికిని పాపమును పాపకార్యములను అనప్యాంచుకొను దేవుడనియు పాపముమానువారికి రక్షణ దయచేయుననియు జెఫన్యా గ్రంథములోనున్నది.


37. ఇప్పటి దేవాలయములకంటె భావికాలమందు మహా మహిమగల దేవాలయము లేచునని హగ్గయి గ్రంథములో నున్నది.


38. పూర్వికులు పాపస్థితిలో ఉన్నందున వారికి హాని కలిగినది. మనకట్లు కలుగకుండు నిమిత్తమై జాగ్రత్తగానుందము అని జ్ఞాపకము తెచ్చిన సంగతి జెకర్యా గ్రంథములో నున్నది.


39. మీ పాపములను గురించి పశ్చాత్తాపపడండి, యెహోవా తట్టు తిరుగండి అని మలాకీ గ్రంథములో నున్నది.

క్రొత్త నిబంధన

1. యేసుప్రభువు రాజై యున్నాడని మత్తయి సువార్తలో నున్నది.


2. యేసుప్రభువు సేవకుడైయున్నాడని మార్కు సువార్తలో నున్నది.


3. యేసుప్రభువు అచ్చమనిషై యున్నాడనియు, మనిషికంటె ఎక్కువైన వ్యక్తి అనియు లూకా సువార్తలో నున్నది.


4. యేసుప్రభువు దేవుడని యోహాను సువార్తలో నున్నది.


5. మేము యేసు ప్రభువును చూచిన సాక్షులమైయున్నామని శిష్యులు కనబరిచిన సాక్ష్యము అపోస్తలుల కార్యములలో నున్నది.


6. నీతిమంతుడు విశ్వాసమువల్ల జీవించును క్రియలవల్లకాదు అని రోమా పత్రికలో నున్నది.


7. యేసు ప్రభువైయున్నాడు అనియు, సంఘములో దిద్దుబాటు జరిగినదనియు మొదటి కొరింథి పత్రికలోనున్నది.


8. సంఘమునకు కావలసిన పరిచర్య జరుగవలెనని రెండవ కొరింథి పత్రికలోనున్నది.


9. క్రీస్తు ప్రభువు సంఘమునకు స్వేచ్చ అనుగ్రహించునని గలతీ పత్రికలో నున్నది.


10. సంఘము క్రీస్తుయొక్క శరీరము అని ఎఫెసీ పత్రికలోనున్నది.


11. క్రైస్తవుల ఐక్యత ఎన్నికష్టములున్నను విడిపోగూడదని ఫిలిప్పీ పత్రికలో నున్నది.


12. క్రీస్తుప్రభువు సంఘమునకు శిరసై యున్నాడని కొలస్సయులకు పత్రికలో నున్నది.


13. క్రీస్తుప్రభువు మేఘాసీనుడై తన సజీవుల సంఘము కొరకు వచ్చునని మొదటి థెస్సలోనికై పత్రికలోనున్నది.


14. క్రీస్తు ప్రభువు భూమిమీదికి తన వారితో వచ్చును. (హర్మగెద్దోను) అని రెండవ థెస్సలోనికై పత్రికలోనున్నది.


15. సంఘ పరిపాలన విషయములు మొదటి తిమోతి పత్రికలో నున్నవి.


16. శ్రమ కాలములో ప్రభువు యెడలగల అభిమానము పోగొట్టుకొనరాదని రెండవ తిమోతి పత్రికలో నున్నది.


17. సంఘమునకు క్రమమైన నడవడిక ఉండవలెను. అని తీతు పత్రికలో నున్నది.


18. పశ్చాత్తాపపడు వారిని క్షమించి చేర్చుకొనవలెనని ఫిలేమోను పత్రికలో నున్నది.


19. యేసుప్రభువు అందరికన్న శ్రేష్టుడని హెబ్రీ పత్రికలోనున్నది.


20. విశ్వాసమున్న లాభమేమి? క్రియలు లేనప్పుడు అని యాకోబు పత్రికలోనున్నది.


21. ప్రభువు నిమిత్తము శ్రమలు పడుట మేలు అని మొదటి పేతురు పత్రికలోనున్నది.


22. భ్రష్టత్వ కాలమందును పవిత్రులమై యుండవలెనని రెండవ పేతురు పత్రికలోనున్నది.


23. దేవునితో సహవాసము కలిగియుండవలెనని మొదటి యోహాను పత్రికలోనున్నది.


24. సత్యమును అంగీకరించి దానికి విధేయులమై యుండవలెనని రెండవ యోహాను పత్రికలోనున్నది.


25. సంఘములో అతిధి సత్కారము కలిగియుండవలెనని మూడవ యోహాను పత్రికలో నున్నది.


26. తొట్రిల్లకుండా జాగ్రత్తగా నుండవలెను. రెండవ రాకకు ముందు లోకముయొక్క దుస్థితి ఎట్లుండునో ఆ సంగతి యూదా పత్రికలోనున్నది.


27. తుదకు క్రీస్తుకును, ఆయన భక్తజన సంఘమునకు ఎట్లు కడవరి జయము కలుగునో ఆ సంగతియు, ఆటంకపరులకు అపజయమెట్లు కలుగునో ఆ సంగతియు ప్రకటన గ్రంథములో నున్నది.