10. అవిశ్వాసి ప్రశ్నలు

(యం. దేవదాసు అయ్యగారి ఉపదేశములు)

---

• నా పాపమువలన వచ్చిన ఈ వ్యాధి, క్రీస్తును నమ్మినంత మాత్రమున పోవునా?
• ఎన్నో మందులు వేసికొన్నాను, ఎంతోమంది వైద్యులు పరీక్షించిరి, ఎంతోమంది దేవతలకు మొక్కుకొన్నాను, అయినను పోలేదు. గనుక క్రీస్తును నమ్మినంత మాత్రమున పోవునా? ఇది ఎక్కడిమాట?
• క్రీస్తును నమ్మినవారిని నేను ఎరుగుదును, వారు మాత్రము బాగైనారా! ఇటువంటి కూటములకు వచ్చిన అందరును బాగగుచున్నారా! పూర్వ జన్మ పాపఫలము తప్పునా? దానిని తప్పించుట దేవునికైనను అలవికాదు. అంతమంది దేవతలను ప్రార్ధించినప్పుడు, క్రీస్తును కూడ ప్రార్ధించినాను. నా జబ్బు నయమైనదా ఏమి?
• దేవునికి కనికరమున్న యెడల జబ్బు రాకుండా జేయకూడదా! మానవ జన్మమే పాపము. గనుక పాపము చేయకుండ ఉండగలమా?
• చేస్తే మాత్రము దేవుడు తెగుళ్ళు పంపవలెనా ఏమి? ఇదేనా ప్రేమ?
• ఇన్నాళ్ళనుండి ప్రార్ధన చేయుచున్నాను. ఇంకను ఏమి జేయగలను?

ఇకను ప్రార్ధన చేయను, ఏమి చేయను. దేవునికి ఇష్టమున్నయెడల బాగుచేయును. లేనియెడల నా పనిఇంతే. ఇట్టి తలంపులు రోగి మనస్సులో పుట్టుచుండును. వాటిని రానీయకూడదు. ఇది జబ్బుకంటె జబ్బు. వీటన్నిటికి విరుగుడు, యేసుక్రీస్తు తలంపే.

11. పాప ఫలితములు

సాతానువలన పాపము ప్రవేశించినది. ఆ పాపము నరులలోనికి జేరినది. దానివలన అవిశ్వాసము, భయము, చింత, అజ్ఞానము. అజాగ్రత్త, అనిశ్చయము, లోపము ఇవి కలుగుచున్నవి. పాపమువలననే వ్యాధులు వచ్చినవి, ఆ వ్యాదుల వలన బాధలేచినది, తుదకు మరణము కలిగినది. విరోధుల వలనను, కరవు వలనను, వరదల వలనను, భూకంపము వలనను, గాడ్పుల వలనను, మంచు వలనను, గాలివానల వలనను, పిడుగుల వలనను, వడగండ్ల వలనను, అడవి మృగముల వలనను, పురుగుల వలనను, ముండ్ల వలనను, చెడు తిండివలనను, కానిమందు వలనను, క్రమములేని వాడుకల వలనను, మరణము కలుగుచున్నది. దాని తర్వాత నిత్య నరకము. ఆ నరకములో అంతములేని బాధ, వేదన. అనగా నేను దేవునిలోనుండి వేరైపోతినిగదా! అను వేదన. నేను దేవుని నమ్మలేదుగదా అను మరొక వేదన. చదువరులారా! ఈ అంశములోని చెడుగును, వానిని దేవుడు కల్పింపలేదు. ఇది బాగుగ జ్ఞాపకముంచుకొనండి. (విలాప 3:33).