(యం. దేవదాసు అయ్యగారి ఉపదేశములు)
సంస్కార ప్రసంగము-1
3-1-1954
దా.కీర్తన 103:1; మత్తయి 28:16-20; 1కొరింథి 11:23-31
యేసుప్రభువా! నాడు నీవు భూలోకములోనున్న నీ సంఘమునకు అనుగ్రహించిన గొప్ప విందు వర్తమానము ఇప్పుడును అనుగ్రహించుమని వేడుకొనుచు వందనములు చెప్పుచున్నాను.
మానవునికి లోకములో పుట్టుట ఒక్కసారే గాని మనము అనేకసార్లు పుట్టము, గాని జీవితకాలములో భోజనము మాత్రము అనేకసార్లు చేస్తాము. బాప్తిస్మము పుట్టుకతో సమానము. అన్యులైనవారు బాప్తిస్మముద్వారా తిరిగి జన్మించినవారై క్రైస్తవులుగా మార్చబడుచున్నారు. ముసలివాడైన నికోదేము తల్లి గర్భములో తిరిగి జన్మిస్తే మనముకూడా తిరిగి రెండవసారి బాప్తిస్మము పొందవచ్చు.
పసి బిడ్డ జన్మించకముందు తల్లిలోని ఆహారమును, రక్తము, ఊపిరి, గుణములు, ప్రాణము అందుకొంటున్నది. తల్లిలోని రక్తము, గుణములు, రూపము, శరీరము అందుకొంటున్నది. తల్లికి ప్రసవము రాగానే బిడ్డను శుభ్రముచేసి, పరుండబెట్టి అచ్చ తల్లి, తండ్రి రూపముతోనే బిడ్డ ఉన్నదని చెప్పుకొందురు. అలాగే ప్రభు భోజనములో రొట్టె, శరీరము, ద్రాక్షారసము, రక్తము ఈ రెండు అందుకొన్నప్పుడు ఆయన గుణాలు, పరిశుద్ధత, మంచితనము, దైవత్వము అందుకొంటున్నది. తల్లిగర్భములోనే బిడ్డ అందుకొన్నట్లు ఇక్కడను అందుకొనుచున్నాము. బిడ్డ ఎదుగునప్పుడు తన తల్లి ఎంత పొడుగుగా ఉన్నదో అంత పొడుగుగా ఎదుగుచున్నది. అలాగే మనమును ప్రభువువలెనె ఎదగవలెను.
తల్లి గర్భములోనున్న బిడ్డకు తాను స్వయముగా తన తల్లియొక్క శరీర రక్తములు అందుకొన్నట్లు ఆ బిడ్డకు తెలియదు. అలాగే గర్భములోని బిడ్డ ఆహారము అందుకొన్నట్లు మనమును రొట్టె, ద్రాక్షారసముతో ఆయనను అందుకొనుచున్నాము. గర్భములోనున్న బిడ్డ తల్లినె అందుకొనుచున్నట్లు బిడ్డకే తెలియకపోయినా అందుకొనుచున్నది. తెలియడము వేరు, అందుకొనడము వేరు. అట్లే తెలియకపోయినా మనమును సంస్కార విందులో ప్రభుని శరీరము, రొట్టెలో అందుకొంటున్నాము. ఆయన రక్తమును ద్రాక్షరసములో అందుకొంటున్నారు. గర్భములో ఉన్న బిడ్డ తన తల్లినే అందుకొనుచున్నది. మనము ప్రభు సంస్కారపు విందులో ప్రభువునే అందుకొంటున్నాము. ఏనాడో అదృష్టము చేసికొన్నందు వలన ఇవి దొరుకుచున్నవి, వద్దనకూడదు. ఈ విందులో ప్రభువే వడ్డించువారై యున్నారు. ఈ విందు బియ్యముతో భోజనము తయారుచేసి, వడ్డించులాంటి విందుకాదు. ఇది ప్రభువు అన్నీ తనలోనున్నవే తీసి తానే వడ్డించియున్నారు. ఈ విందు భోజనశాలనుండి గాని, హోటల్ నుండిగాని తెచ్చిందిగాదు, మరియు వంటగది భోజనము, ఇంటిలోని భోజనముకాదు, దేవాలయములో ప్రభువే తానే ఇచ్చే భోజనము.
గుడిలో పాదిరిగారిచ్చేది రొట్టె, ద్రాక్షారసముకాదుగాని, దానితో ప్రభువు శరీరము, రక్తము ఇస్తున్నారు. కనబడే రొట్టె, ద్రాక్షారసమును మొదటిసారిగా ప్రభువు ఇచ్చేటప్పుడు తన శిష్యులకు కనబడని శరీర, రక్తములను గురించి వివరించెను. శిష్యులేమి అర్ధముచెసికొన్నారు ప్రభువుకు తెలియదు. గాని తాను వచ్చు పర్యంతము ఈ క్రమమును బోధకులను ఆచరించమనెను. బిడ్డ తొమ్మిది నెలలు గర్భములోనుండి జన్మించాకకూడ తన తల్లే కావలెను అన్నది. అన్నము తినిపించిన, క్రిందపడినా తనతల్లే లేవదీసి తినిపించెను. అట్లే ప్రభువు తనే ఆహారముగా మనకు తినిపించును.
గురువారము రాత్రి 11మంది శిష్యులకు ప్రభువు తననితాను తినిపించెను. అక్కడ బోధయేమి చేయలేదు. ఇది విని సంస్కారముగురించి అన్యులైనవారు శిష్యులైనవారు ఆయనను ఎలాగు తిన్నారు? అని అడుగవచ్చు. అది వట్టిమాట అని అన్నట్లయితే, మనము వారిని ఈరీతిగా ప్రశ్నించవలెను. నీవు ఏలాగు తల్లిగర్భములో ఉండి తల్లి రక్తము త్రాగినావని? అనవలెను. ప్రయాసపడి భారము......నాయొద్దకు రండి అని ప్రభువు పిలుచుచున్నట్లు ఒకరాజుగారు విందుచేయించి అంతా సిద్ధముగానున్నది. సందు, గొందులలో ఉన్నవారలారా రండి అని పిలిచెను. అట్లే ప్రభువు సమస్తము సిద్ధముగానున్నది. నేను మీలోనికి రావటానికి సిద్ధముగానున్నాను. రండి అనుచున్నారు.
బిడ్డ ఆహారము తింటున్నా చిక్కిపోతుండును గనుక వెంటనే వైద్యునికి చెప్పి ఏదో ఒక ఔషదము ఇవ్వాలి. అప్పుడు తల్లి బిడ్డలోనికి రావడానికి పాలిచ్చి బలపర్చును. అలాగే సంస్కారము తీసికొన్న మనముకూడ చిక్కకూడదుగాని, మనుష్యులముగాన చిక్కిపోతాము. గనుక మరలా మరలా పుచ్చుకొనవలెను. ఈ చిన్న వర్తమానమువలె చిన్నరొట్టె, కొంచెమే ద్రాక్షరసము పుచ్చుకొని అనుభవించి బలముపొందండి. ప్రభువు మిమ్ములను తన వాక్యముద్వారా, శరీరముద్వారా, రక్తముద్వారా దీవించి బలపరచునుగాక! ఆమేన్.