నిర్గమకాండము 32 - పోతదూడ వలన తీర్పు

దారి తప్పుటకు ముందు దూరదృష్టి నశించును. ప్రజలదృష్టి పరలోక దేవునితట్టు చూడక, భూలోక దేవతవైపు మరలినది. "ఆ మోషే" పరదేశిగాను, అహరోను స్థానికునిగాను భావించిరి. కాని ఐగుప్తునుండి విడిపించి, నడిపించినవాడు మోషే అను ఒక్క నిజమును మాత్రము చెప్పిరి.

దేవుని 10 ఆజ్ఞలు మోషే వివరించిన తర్వాత ప్రజలందరు తలలు వంచి అంగీకరించిన తర్వాతనే మోషే 7వ సారి సీనాయి కొండ ఎక్కెను. ప్రజలవద్ద దైవ ఉనికి లేదు గాని దైవ వాక్కులు(ఆజ్ఞలు) ఉన్నవి. అయితే ప్రజలు డైరెక్ట్‌గా మొదటి ఆజ్ఞలను అతిక్రమించిరి.

దేవుడు సీనాయి కొండమీద చెప్పిన పనులన్నియు చేయుటకు సిద్ధమనసు ప్రజలవద్ద ఉన్నది, కాని మూఢభక్తినైజము ముదిరి దూడను పొదిగినది. దైవ చిత్తములోని క్రియలు చేయుటకు దేవుడు కొంతమందికి జ్ఞానాత్మను దయచేసెనని నిన్నటి ధ్యానములో చూసాము. కాని జ్ఞానాత్మపూర్ణులు తమ పనిని ఇంకా మొదలు పెట్టకముందే ఈ పనికి దైవచిత్తములోలేని అహారోను పనిచేయుటవలన దూడ ఏర్పడినది. సీనాయి కొండపై అహరోనుకు దేవుడు అమర్చిన అంగీ మహిమ వేరు, పాళెములో అహరోను ధరించిన పాత్ర వేరు. దేవుని సన్నిధిలో కనిపెట్టుట అను ప్రక్రియ యొక్క ఆవశ్యకం ఇక్కడ కనబడుచున్నది.

దైవ చిత్తమును అడ్డుకొని దైవకార్యములకు ఉపయోగించవలసిన వనరులను ముందుగా పాడుచేయుట సాతాను పని. విగ్రహారాధన ఏదైనను సరే, చివరికి నాశనమునకు దారితీయును.

Trap: "ఐగుప్తు నుండి రప్పించిన దేవుడు ఇదే" అని పోత దూడను కీర్తించుటనే "మాయాస్వరూపము" అందురు.

నిశ్శబ్దకాలమున నరుడు దేవునియందు నిలకడగా ఉండుటయే నిజమైన దైవభక్తి.

మన ప్రార్థనలకు దేవుని సమాధానము ఇంకను రాకపోయినను, దేవుని కృప కొరకు కనిపెట్టు ఓపికను మనకు ప్రభువు అనుగ్రహించును గాక! ఆమేన్.
మోషే దేవునితో ఉన్న ప్రకారం, మనం దేవాది దేవుని చేరి జీవించుదుము గాక! ఆమేన్.

పాపంబు నరులకు - పరమాత్ముని మరుగుచేసెను - అయ్యయ్యో
పాపులందుచేత - పలువిధ దేవుండ్లను కల్పించిరి - విచారం ||అనాది||

ఇశ్రాయేలు ప్రజల తిరుగుబాటు మోషే మీద కాదు గాని దేవుని మీద అని పరిశుద్ధాత్మకు తెలియును. వారి భావన ఈ విధముగా నున్నది:
యెషయా 63:11. అప్పుడు ఆయన పూర్వదినములను మోషేను తన జను లను జ్ఞాపకము చేసికొనెను. తన మందకాపరులకు సహకారియై సముద్రములో నుండి తమ్మును తోడుకొనివచ్చినవాడేడి?
12. తమలో తన పరిశుద్ధాత్మను ఉంచినవాడేడి? మోషే కుడిచేతి వైపున మహిమగల తన బాహువును పోనిచ్చినవాడేడి?
13. తనకు శాశ్వతమైన ప్రఖ్యాతి కలుగజేసికొనుటకు వారిముందర నీళ్లను విభజించినవాడేడి? మైదానములో గుఱ్ఱము పడనిరీతిగా వారు పడకుండ అగాధజలములలో నడిపించిన వాడేడి? యనుకొనిరి.

ఒకసారి వెలిగింపబడి, యేసుక్రీస్తు ప్రభువునందు సంపూర్ణ విశ్వాసముకలిగి, ఆయన వాక్యము మనలో నివసించుచున్నపుడు, ఎల్లప్పుడును దైవ సన్నిధి మనకు తోడుగా నుండును. సన్నిధి వదిలిన యెడల సందేహములు వచ్చును కావున దేవుడు తన సన్నిధి కాంతిని మనపై ప్రకాశింపజేయును గాక! ఆమేన్.

జూలై 1 నుండి ఆగస్టు 9 వరకు ప్రతిరోజు నిర్గమకాండములో ఒక అద్యాయమునందు గల విశేషములు ధ్యానించుటకు ప్రభువు కృప దయచేయును గాక! ఆగస్టు 10వ తేదీన తైలాభిషేక పండుగ.