క్రమకర్త: ఫాదర్. ముంగమూరి దేవదాసు

4. దయ్యములను వెళ్ళగొట్టే దైవప్రార్ధనాంశములు

---

• 104) యేసుప్రభువా! దయ్యములను వెళ్ళగొట్టుడని (మార్కు 16:17)లో తెలియపరచినావు, కనుక మేము అడుగుచున్నాము. బైబిలుమిషను మీదకు వచ్చిన దయ్యములను వెళ్ళగొట్టుము. అపవాదిని ఎదిరించుడి, అప్పుడు వాడు మీ యొద్ద నుండి పారిపోవునని (యాకోబు 4:7)లో వ్రాయించినావు. సాతానును మా కాళ్ళక్రింద శీఘ్రముగా చితుక త్రొక్కించెదనని వ్రాయించినావు (రోమా16:20). అది ఇప్పుడే నెరవేర్చుము. సన్నిధి కూటస్థులు నీ సెలవు అడిగి సైతానును, వాడి అనుచరులను, వాని దూతలను వెళ్ళగొట్టునట్లు ఏర్పరచుము.


• 105) మా దేవా! నీవు మనుష్యులను రక్షించినావు. దయ్యములలో ఒక దయ్యమునైనా రక్షించినావా! లేదు. దానినిబట్టి చూస్తే, దయ్యములు ఎంతగా చెడిపోయినవో మాకు తెలియుచున్నది. కాబట్టి సైతాను ఈ మాటలు వినేటట్లు చెప్పగల శక్తి దయచేయుము.


• 106) ప్రభువా! మార్కుసువార్త మొదటి అధ్యాయములో, నీవు దయ్యములను వెళ్ళగొట్టినావని వ్రాయబడియున్నది. అప్పుడు ఆ దయ్యము వెళ్ళిపోవుచు, ఆ రోగిని విలవిల లాడించినది. ఎందుచేత? నీవు వెళ్ళగొట్టేటప్పుడు ఆ మనిషిలో నుండుటకు వీలులేదు గనుక.
  
  ఉదా:- ఇద్దరు కుర్రవాళ్ళు వీధిలో పోట్లాడుకొను చుండగా, ఒకడు రెండవ వానిని పడగొట్టి వెళ్ళిపోవుచున్నాడు. పడిపోయినవాడు, "ఇంకొకసారి రమ్ము ఏమిచేస్తానో చూడు"! అని అనెను. మొదటి కుర్రవాడు రెండవ కుర్రవానిని జయించినా, శక్తిలేనివాడే అనిపించుకొనును. ఎందుకనగా, అతడు ఇంకా అక్కడే ఉంటే, ఆ పడిపోయిన అబ్బాయి బంధువులు వచ్చి, ఆ కొట్టిన వానిని కొట్టుదురని వెళ్ళిపోవును. అదే శక్తిలేకపోవుట, సైతానుకు అటువంటి శక్తిలేనితనమే ఉన్నది. ప్రభువా! ఈ ఇద్దరి కుర్రవాళ్ళ సంగతి ఎత్తి మేము సైతానును జయించుటకు కృప దయచేయుము.


• 107) ప్రభువా! "దయ్యములు కూడ దేవునికి వణకుచున్నవని" యాకోబు వ్రాసినాడు (యాకోబు 2:19). దయ్యములు ఎందుకు వణకుచున్నవి? వాటికాలము రాకముందే నీవు వాటిని నరకములో పడవేస్తావని అవి భయపడ్డవి. ఈ అంశము ఎత్తి మేము దయ్యములను ఎదిరించునట్లు జ్ఞానోదయము దయచేయుము.


• 108) దేవా! సృష్టి అంతటిచేత దయ్యములను త్రొక్కించుము. ఓ దేవా! యం.దేవదాసు అయ్యగారు రాత్రులు మంచముమీద ఉండి, ఒక అంశము మీద పత్రిక ఏలాగు వ్రాయవలెనో ఆలోచించిరి. ఆ వ్రాత అంతయు వరుసగా మనసులోనికి వచ్చినది. వ్రాయలేదు, అచ్చుపడలేదు. అయినప్పటికిని అది మనో పత్రికమీద ఉన్నది కదా! కనుక నీ దూతలను పంపి, భూతములన్నిటికి ఆ పత్రికను చూపించుము. అప్పుడవి భయపడును. కాగితముమీద సంగతి వ్రాసినప్పుడవి రెండవసారి భయపడును. అది అచ్చువేసినప్పుడవి మూడవసారి భయపడును. మేము ప్రజలకు ఆ పత్రికను పంచిపెట్టగా, వారు చదువుకొన్నప్పుడు భూతములు మరియొకసారి భయపడును. ప్రజలు, ఆ అచ్చుకాగితమును బట్టి నడచుకొన్నప్పుడవి మరి ఎక్కువగా భయపడును. ఈ ప్రార్ధన ఆలకించుము. ఆమేన్.