క్రమకర్త: ఫాదర్. ముంగమూరి దేవదాసు

2. సాతాను క్రియలకు వ్యతిరేకమైన పని

---

• 1) స్త్రీ వలన మానవ సంతతికి పాపము వచ్చెను. దేవుడు మరియమ్మ అను ఒక స్త్రీలోనుండి ఆ పాపమును పరిహరింపగల రక్షకుని రప్పించెను. దెబ్బకు దెబ్బ. ఇది చూచుటవలన సాతానుకు బాధ, సిగ్గు కలుగక మానదు. గనుక సాతాను గుండెలో రాయి పడినది.


• 2) ఆదాము అను పురుషుడుకూడ పాపములో పడెను. స్త్రీకి ఆదరణగా క్రీస్తు ప్రభువు స్త్రీవలన జన్మించెను. గనుక స్త్రీలందరు సంతోషించవలసినదే.


• 3) పురుషులకు ఆదరణగా క్రీస్తుప్రభువు పురుష రూపముతో జన్మించెను. గనుక పురుషులందరు సంతోషించవలసినదే. ఆదిలో స్త్రీ పురుషులకు జన్మమును కలుగజేసిన దేవుడు, ఇప్పుడు ఆ స్త్రీ పురుషులకు రక్షణ అను జన్మమును అనగా నూతన సృష్టిని కలుగజేసెను. దేవుని విజ్ఞానము యెదుట సైతాను జ్ఞానము ఏమి పనికి వచ్చినది? చదువరులందరు ఈ గొప్ప విషయము తెలిసికొని బలపడవలెను.

3. ఘర్షణ

---

• 1) పురుషులు: స్త్రీలారా! మీవల్లనేగదా! మీకును, మాకును గొప్ప కుమ్మరము వచ్చినది.


• 2) స్త్రీలు: స్త్రీ చెప్పినమాట పురుషుడు ఎందుకు వినవలయును? పురుషునిది నేరము కాదా! నిషేధవృక్ష ఫలము తినకూడదని దేవుడు పురుషునికి చెప్పలేదా?


• 3) పురుషులు:- స్త్రీ పండ్లు తెచ్చియుండని యెడల పురుషుడు తినునా?


• 4) స్త్రీలు:- స్త్రీ పండ్లు తెచ్చి ఇచ్చినప్పుడు, దేవుడు తినవద్దన్న పండ్లు ఎందుకు తెచ్చినావని పురుషుడెందుకు అడుగలేదు?


• 5) పురుషులు:- దేవుడు స్త్రీని పురుషునికి సహాయముగా ఇచ్చెను. గనుక నా సహాయార్ధమై స్త్రీ పండ్లు తేచ్చినదనుకొని అడుగలేదు.


• 6) స్త్రీలు:- నేడు భోజన సమయమందు భార్యలు క్రొత్త కూర వడ్డించినప్పుడు, ఇదెక్కడిది? ఇదేమి కూర? అని పురుషులు అడుగుట లేదా? ఆ పురుషుడు ఎందుకు అడుగలేదు!