(యం. దేవదాసు అయ్యగారి ఉపదేశములు)

రోగులు చేసికొనవలసిన ప్రార్ధన

---

ఓ యేసుక్రీస్తు ప్రభువా! నీవు వైద్యుడవైయున్నావు గనుక వందనములు. నీయొద్దకు పూర్వకాలము ఎంతమంది రోగులు వచ్చినారో అందరిని బాగుచేసినావు. గనుక నన్నును బాగుచేయుము. ఎటువంటి వ్యాధియైన బాగుచేసినావు గనుక నా వ్యాధి బాగు చేస్తావు. ఓ తండ్రీ నేను నిన్ను నమ్ముకొనియున్నాను. తగిన ఔషదము దొరికేటట్టు చేసికూడ నీవు బాగుచేయగలవు. ఔషదము లేకుండాకూడ బాగుచేయగలవు. నీ వాక్యమే గొప్ప ఔషదము. నీ వాక్యము నాకు ఇంకను బాగుగా నేర్పించుము.

ఓ యేసుక్రీస్తు ప్రభువా! నీవు దయ్యాలను వెళ్ళగొట్టితివి. ఇప్పుడుకూడ వెళ్ళగొట్టగలవు. పాపాత్ముల పాపములు క్షమించితివి. చనిపోయిన వారిని బ్రతికించితివి. నేను నిన్ను నమ్ముకొన్నాను గనుక నీవు ఎంత ఉపకారమైన చేయగలవు. నాకు ఆ నమ్మిక కలిగించుము. నా మనస్సులోకి అపనమ్మిక రానియ్యకుము. అవిశ్వాసము రానియ్యకుము. సందేహము రానియ్యకుము. నా మనస్సులో ధైర్యము కలుగజేయుము. విసుగుదల కలుగును గనుక దానిని రానియ్యకుము. ఓ తండ్రీ! నీకనేక నమస్కారములు.

నా మనస్సులో ధైర్యము, విశ్వాసము, నిరీక్షణ కలిగించుము. జబ్బులు బాగుచేయుము. నేను ఎల్లప్పుడు నీ సేవలోయుంటాను. నాకు పరిపూర్ణ ఆరోగ్యము దయచేయుము. ఈ కాలములోకూడ అనేకమంది రోగులు మందులు వాడుకొనకుండ బాగు అగుచున్నారని అనుకొనుచున్నాను. నా ప్రార్ధనలు నీ కృపనుబట్టి ఆలకించుమని వేడుకొనుచున్నాను. ఆమేన్.

ప్రార్ధన చేయట సూచనలు:

• 1. నీవే స్వయముగా నీ హృదయ పూర్వకముగా నీ హృదయములోని కష్టములన్నీ మనవులన్నీ నీ తండ్రి యెదుట ధారపోయుము. నీ మనస్సునకు సంతుష్టి కలిగే వరకు ప్రార్ధన చేయుము. నీవు నీ ప్రార్ధనలకు జవాబు వచ్చునని కనిపెట్టుము. జవాబు వచ్చేవరకు మోకాళ్లమీద యుండుము.


• 2. ప్రసంగించుటకు నీకు ఎవరైనా జత వచ్చేవరకు ఆగక ఇతరులకు సువార్త స్వతంత్రముగా చెప్పుము. ఒకవేళ నీవు ప్రసంగము చేసే ఆ సమయము వినేవారికి ఆఖరు సమయమై ఉండవచ్చును. నీవు రక్షించబడినావు గనుక ప్రతి దినము ఎవరికో ఒకరికి రక్షణ వార్త చెప్పవలెను.


• 3. దాతృత్వము అనగా దేవుని సంఘాభివృద్ధికై చందాలు ఎంత ఇవ్వవలెనో ఇతరులను అడుగక ధారాళముగా ఇవ్వవలెను.


• 4. సలహాలు అనగా ఏదైనా ఒక చిక్కు వచ్చినప్పుడుగాని, మిక్కిలి కష్టమైనపని వచ్చినప్పుడు గాని దేవుని సలహా అడుగుము. ఇతరులయొక్క సలహాలమీద ఆనుకొనవద్దు. ఏ పనియైనా స్వతంత్రముగా నీ అంతట నీవే చేయుము.