సమయోచిత వాణి

---

క.   “పరమాత్మ భావతత్వము
లెరిగింపను హృదయశుద్ధి నెరిగింపను సు
స్థిరతర శాంతి నొసంగను
పరిశుద్ధాత్మను నుతించి ప్రార్ధనజేతున్”

“నాయొద్దనుండుట-కై యాత్మపంపిన
తండ్రి! -ప్రసిద్దమౌ - స్తవమునీకు
నాతో వసింపను - దాతనుబంపిన
తండ్రీ! వినోదమౌ - స్తవమునీకు
నాలోన నీయాత్మ - వాలంగ బంపిన
తండ్రీ! విశుద్ధమౌ - స్తవమునీకు
నాయాదరణమున - కై యాత్మనంపిన
తండ్రీ! ప్రకాశమౌ- స్తవమునీకు"

సర్వసత్యమునకు నడ్పి - సంగతులను
స్పష్టపర్చి వివిధములౌ - వరములిచ్చి
ఆత్మవర్తనకై యాత్మ - పంపినావు
తండ్రీ! సర్వదా సర్వత్ర - స్తవమునీకు”

ప్రస్తుతకాలములో అనేకమంది క్రైస్తవులు త్రిత్వములోని తండ్రియైన దేవుడు సృష్టికర్తయనియు, ఆయన పరభూలోకములను సృజించెననియు; కుమారుడైన యేసుప్రభువు పాపులకొరకు సిలువ మరణ, పునరుత్థానము పొందవలెననియు, ఆయనే సర్వలోక రక్షకుడనియు కొద్దియో, గొప్పయో చెప్పగలరు గాని ఆదరణ కర్తయైన పరిశుద్ధాత్మ తండ్రిని గురించి అపోస్తలుల కార్యములు 19:2లో చెప్పబడినట్లు, "పరిశుద్ధాత్మ యున్నాడన్న సంగతియె తెలియదు" అని చెప్పినవారివలె ఉన్నారు గనుక ఆయనను గురించి పూర్తిగా చెప్పలేరు. ఇట్టి అంశమును మన ఆంధ్ర క్రైస్తవులకొరకు సంక్షిప్తముగ వ్రాయుట అగత్యమని మాకు తోచుటవల్ల ఈ గ్రంథము వ్రాయడమైనది.

రాజమండ్రి వాస్తవ్యులైన యం. దేవదాసు అయ్యగారి ఉపదేశముద్వారా పరిశుద్ధాత్మ బాప్తిస్మమును గురించి నేర్చుకొని ఇట్టి పుస్తకమును వ్రాయగలిగితిమి. అందుకు ప్రభువునకు స్తోత్రమును, మహిమయు కలుగునుగాక!

ఆయన బసలోనికి మేము ముప్పదిమందిమి తరచుగా వెళ్ళి కొన్ని సంగతులను నేర్చుకొనేవారము. అయితే 1935వ సంవత్సరములో ఒక ప్రశ్న వేసినాము. “పరిశుద్ధాత్మ బాప్తిస్మమును గురించి మాకు ఎన్నడును బోధించలేదు, ఎందుచేత" అని ప్రశ్నించగా? అందుకాయన ఇది మన మిషన్ సిద్దాంతములలో లేదు గనుక నేను బోధించలేదు అని జవాబిచ్చినారు. "బైబిలులో ఉన్నదా?" అని మేము అడిగినాము, ఆయన ఉన్నదని చెప్పినారు. అలాగైతే అది మాకు పూర్తిగా వివరింపవలనినదని పట్టుపట్టినాము. అప్పుడు ఆయన బోధించినారు. మేము ప్రత్యేకమైన ప్రార్థన కూటములు పెట్టుకొని వాడుకలో పెట్టుకొన్నాము. మాలో చాలమందికి కుమ్మరింపు కలిగినది. భాషలు వచ్చినవి. అర్ధములు, దర్శనములు కలిగినవి. అప్పుడు ఈ సిద్ధాంతములు నిజమని దృఢమైనదిగాని పిశాచి తన పనిని చేయలేదని మాత్రము మేము చెప్పలేము.

ఈ బోధ మేమనుకొనని సమయమందు తెలుసు కొనవలెనని వేసిన ప్రశ్న మూలముగా దానంతట అదే బయటకు వచ్చినది. కాబట్టి ఇది దైవికమని మేము గ్రహించుచున్నాము. ఈ బోధ స్థలాంతరములందు బోధించుచున్న కె. విజయరత్నంగారు అప్పుడప్పుడు నేను పోగుచేసిన పుస్తకములోని అంశములను వరుసగా పెట్టుటలోను, అచ్చువేయించుటలోను చేసిన సహాయమునకు కృతజ్ఞుడనైయున్నాను.

• 1. మనకొక బోధ క్రొత్త బోధగా తోచినయెడల, ఇది బైబిలులో ఉన్నదా? అను ప్రశ్నవేసికొనవలెను. బైబిలులో ఉంటే తప్పక అంగీకరించపవలయును (అపో॥కార్య॥ 17:11,12).


• 2. “ఇది బైబిలులో లేదుగాని బైబిలు బోధకు సరిపోయినదా!" అనికూడ ప్రశ్నించుకొనవలయును. సరిపోతే సమ్మతింపవలెను.


• 3. బైబిలులో ఉన్నదిగాని వాడుకలో లేదుకదా! అని అందురేమో. అలాగైతే వాడుకలోనికి తెచ్చుకొనుట మంచిదేకదా? పరిశుద్ధాత్మ బాప్తిస్మమట్టిదే.


• 4.
  • 1) దేవుడు తన బల్లమీద మన నిమిత్తమై అనేకమైన దానములు పెట్టియుంచినాడు. మన ఇష్టము వచ్చినవి తీసుకొని మనము వాడుకొనవచ్చును. వాటిలో ఒకటి పరిశుద్ధాత్మ బాప్తిస్మము. “పౌలైనను, అపోల్లోయెనను, కేఫాయైనను, లోకమైనను, జీవమైనను, మరణమైనను, ప్రస్తుతమందున్నవియైనను రాబోవునవైనను సమస్తమును మీవే. మీరు క్రీస్తువారు, క్రీస్తు దేవునివాడు” అని 1కొరింధి. 3:22-23లో లేదా?
  
  
  • 2) “అందుకతడు కుమారుడా! నీవెల్లప్పుడు నాతోకూడ ఉన్నావు. నావన్నియు నీవి” (లూకా. 15:31) అని ఉపమానములోని తండ్రి పెద్దకుమారునితో అనెను. పరలోకపు తండ్రియు ఈలాగు అనే తండ్రియైయున్నాడు.
  5. పరిశుద్ధాత్మ బాప్తిస్మమునుగూర్చి వ్రాసిన ఈ చిన్న పుస్తకములోని ప్రశ్నలకు సాధ్యమైనంతవరకు స్వంత వ్యాఖ్యానము లేకుండా బైబిలు వాక్యములతోనే ప్రత్యుత్తరములు వ్రాయబడినవి.


• 6. ఒక సంగతి సరియైనదో కాదో పని నిశ్చయము తెలియనప్పుడు ఎదిరింపవద్దు అనియు, ఖండింపవద్దనియు, ఊరకుండవలసినదనియు నా సలహాయైయున్నది. తప్పు అని నిశ్చయము తెలిసినప్పుడు గద్దింపవలెను, ఖండింపవలెను. ఆత్మవల్ల నడిపించబడితేనే గాని అదియు చేయకూడదు.


• 7.
  • (1) స్తెఫనుయొక్క పని పరిశుద్ధాత్మ పూర్ణమైనదై యుండెను గాని ప్రజలు అది గ్రహింపలేకపోయిరి. అందుచేత వారు మాటలాడకుండ ఊరకుండవలసినది, కాని ఎదిరించినారు కాబట్టి ఆయన “ముష్కురులారా! హృదయములను చెవులను దేవుని వాక్యమునకు లోపరచనొల్లనివారలారా! మీ పితరులవలె మీరును ఎల్లప్పుడు పరిశుద్ధాత్మను ఎదిరించుచున్నారు అని ఖండింపవలసి వచ్చెను (అపో॥కార్య॥ 7:51).
  
  
  • (2) “దేవుని పరిశుద్ధాత్మను దుఃఖపరచకుడి. విమోచన దినము వరకు ఆయనయందు మీరు ముద్రింపబడియున్నారు” అని ఎఫెసీ. 4:30లో నున్నది.
  
  
  • (3) అలాగే పరిశుద్ధాత్మ బాప్తిస్మకాలమందు పేతురు చేసిన బోధను అంగీకరింపని వారి విషయములో ఆయన ఇట్టి మాటలే చెప్పవలసివచ్చెను. “మీరు మూర్కులగు ఈ తరమువారికి వేరై రక్షణ పొందుడి” (అపో॥కార్య॥ 2:41).


• 8. Sour’s History of the Christian Church Vol 3 PP. 406 “Dr. Martin Luther was a prophet, evangelist speaker in tongues and interpreter, in one person, endowed with all the gifts of the spirit.”
  
  సవరు దొరగారు వ్రాసిన సంఘచరిత్ర ౩వ సంపుటము 406వ పేజీలో ఈ మాటలున్నవి. “డాక్టరు మార్టిన్ లూథరు, ప్రవక్త, బోధకుడు, భాషలతో మాటలాడువాడును, అర్ధము చెప్పువాడునై యుండెను. ఒకనియందే ఆత్మవరములన్నియు కలిగియుండెను. ఈ సంగతి ఎప్పుడైనా విన్నారా?
  
  


• 9. (Spirituals PP, 75-76) ‘D.L. Moody stood up in London at a great convention and began to read the Bible but he was not able to do so as he came out in tongues: again he tried, but failed.’
  
  స్పిరిచ్యుయల్స్ అను పుస్తకములో 75-76 పేజీలలో ఈలాగున్నది : 'డి.యల్. మూడీ దొరగారు లండన్లో ఒక గొప్ప సభయందు నిలువబడి బైబిలు చదువుట ప్రారంభించెను. అయితే భాషలు వచ్చుటచేత ఆగవలసివచ్చిను. మరల చదువుటకు ప్రయత్నము చేసెను కాని లాభము లేకపోయెను.


• 10. లూథరన్ కంపేనియన్ అను ఇంగ్రీషు పత్రికలో పరిశుద్ధాత్మ బాప్తిస్మము పొందవలసియున్నదని వ్రాయబడియున్నది.


• 11. ప్రియమైన చదువరులారా! ఒక మనవి. ఈ చిన్న పుస్తకము నలగజదివి తరువాత మోకాళ్ళూని ఈ పుస్తకములోని సంగతులు సత్యమైనవో కావో పరిశుద్ధాత్మను అడగండి. ఆయనే మీకు బయలుపరచును. యేసుక్రీస్తు ప్రభువునొద్ద మూడు సంవత్సరముల ఆరుమాసములు ఉపదేశముపొంది, ఆయన చరిత్రను స్వయముగా చూచిన శిష్యులు సహితము పదిరోజులు ఎడతెగక ప్రార్థనలో ఉండి కనిపెట్టితేనేగాని పరిశుద్ధాత్మ బాప్తిస్మమును పొందలేకపోయిరి. అట్టి అభిషేకము మనకు కావలసిన యెడల మనకెంత కాలము పట్టునో! గనుక పరిశుద్ధాత్మనుగాని, పరిశుద్ధాత్మకు సంబంధించిన పనులుగాని తృణీకరింపకండి.


• 12. ఈ దినములలో అనేకమంది పరిశుద్ధాత్మ బాప్తిస్మమును గూర్చి ప్రశ్నలు వేయుచున్నందువలన వారు, వీరు చెప్పుచున్న మాటలుగాక బైబిలులో ఏమి ఉన్నదో చూపించుటకై ఈ పుస్తకము వ్రాయబడినది.

పరిశుద్ధాత్మ బాప్తిస్మమును గురించిన బోధ పెంతెకొస్తు మిషను బోధ గనుక అంగీకరించకూడదని కొందరనుచున్నారు. ఇట్లు అనే సందడిలో పడిపోయి 'ఇది బైబిలు బోధ' అనే మాట మరచిపోవుచున్నారు. పొందవలసిన మహోపకారము మీరు పొందకుండ మీ అనుమానపు మాటే మీకద్దు. క్రైస్త్రవసంఘము పెంతెకొస్తునాడు పరిశుద్ధాత్మ బాప్తిస్మము మూలముగ జన్మించెను గనుక పెంతెకొస్తు మిషను కాదుగాని "పెంతెకొస్తు సంఘము" అని చెప్పుట సత్యమునకు దూరముకాదు. ఆదికాల క్రైస్తవమత సంఘారంభమందున్న పరిశుద్ధాత్మ బాప్తిస్మమును ఈ కాల సంఘము :

• 1) “ఇది పెంతెకొస్తు మిషను బోధ అనే వంకమీదను; చిన్నతనమందు నీళ్ళ బాప్తిస్మము పొందినప్పుడే పరిశుద్ధాత్మ బాప్తిస్మముకూడ పొందినాము అను వంకమీదను; ఇది అవలంభించిన వారిలో ఇంకను లోపములున్నవి గనుక ఇది సరికాదు అనే వంకమీదను; ఇది మనకు కాదు అనే వంకమీదను; లేకుండ చేసుకొంటే ఏమనగలము?


• 2) ఆ విధముగనే “గుర్తులు అయిపోవుచున్నవి గనుక క్రీస్తురాకడ సమీపించుచున్నది” అని ఎవ రైన అంటే, “అదిగో అడ్వెంటిస్టు వారి బోధ తెచ్చిపెట్టుచున్నారు" అని ఆ వంకమీద కొందరు ఆయన రెండవ రాకడకు సిద్ధపడకుండ ఉంటున్నారు. సంవత్సరము నిర్ణయముచేయుట, తప్పుడు లెక్కలలోనికే వెళ్లుచున్న మాట వాస్తవమే అయిననూ, తెలివితేటలును విశ్వాసమును గలిగి సంగతులు గమనించవలెను.

షరా:- చదువరులందరు ఈ పన్నెండు సలహాలను గమనించుచు, ఈ పుస్తకము చదువవలెనని నా కోరికయైయున్నది.

జూన్ 1937
N.D. ఫిలిప్సన్
ధవళేశ్వరం.