ప్రార్ధనా పద్ధతి

---

యేసు ప్రభువు భూమిమీద నున్న 3½ సం॥ల కాలముయొక్క చివరలో ఒక ఆజ్ఞ ఇచ్చెను. ఆ ఆజ్ఞ "మీరు సర్వలోకమునకు వెళ్ళి, సర్వసృష్టికి సువార్త ప్రకటించుడి" అనునది. ఆయన 3½ సం॥ల సేవ కాలమున కొన్ని సలహాలిచ్చెను. అందొకటి ప్రార్ధించండి అనునది; ఆజ్ఞ ప్రకారము చేయుట సుళువా, సలహా ప్రకారము చేయుట సుళువా? ముందు సలహా నెరవేర్చిన తర్వాత ఆజ్ఞ ప్రకారము చేయగలము. గనుక ముందు ప్రార్థించవలెను. ప్రార్ధనలో ఆజ్ఞలు నెరవేర్చు బలము వచ్చును. గనుక ముందు ప్రార్ధన పద్ధతి నేర్చుకొనవలెను. అప్పుడు ప్రార్ధనలో వచ్చిన బలమువల్ల సర్వలోక సంచారము చేయగలము. "సర్వలోకమునకు వెళ్ళి, సర్వ సృష్టికి సువార్త ప్రకటించుడి" అనునది అప్పుడు నెరవేరును. అనగా లోకమంతా తిరిగి అన్ని భాషలలో సువార్త ప్రకటించుము. అయితే మనము పద్ధతి లేకుండ ప్రార్ధన చేయుచున్నాము. అయినను, ఆయన దయగలవాడు గనుక అంగీకరించు చున్నాడు. మత్తయి 6:6 లో ప్రార్ధన పద్ధతి గలదు. నేను కొన్ని పద్ధతులు నేర్పించి అచ్చువేయించినాను.

ఉదా:- కలెక్టరుగారికి పిటిషను ఒక పద్ధతి ప్రకారము వ్రాయవలెను. ఆ పద్ధతి ప్రకారము ప్రార్థన చేసిన బలము వచ్చును. అప్పుడు ఆజ్ఞలను నెరవేర్చుటకు, వాక్యము ప్రకటించుటకు బలము వచ్చును. అప్పుడు యేసు క్రీస్తు నా రక్షకుడు అనునది స్థిరమగును. నేను తప్పకుండా మోక్షమునకు వెళ్ళుదును అనునది స్థిరమగును.

• 1. మనోనిదానము: సమస్తమును మరచి క్రీస్తు ప్రభువునే మనము చూడవలెను. ఫోటో తీయువారు - మెదలవద్దు, కదలవద్దు అని చెప్పుదురు. ఆలాగున యేసునే ధ్యానించుటయే మనోనిదానము. ఇది ఒక అంశము. దీనిని గూర్చి నేర్చుకొనిన యెడల బలము వచ్చును.
  
  స్తుతి: తండ్రిని స్తుతించవలెను. గత కాలములో చేసిన మేళ్ళు, తొలగించిన కీడులు, కలిగించిన ఉపకారములు తలంచుకొని స్తుతించవలెను. రాబోవు కాలములోని మేళ్ళు తలంచుకొని స్తుతించవలెను.
  
  ఉదా: అధికారి కనబడినప్పుడు ముందు సలాము చేయుదుము. తరువాత మన మనవి చెప్పుదుము. ఆలాగే దేవునికి నమస్కరించుట మన మొదటి పని. మనో నిదానము వలన బలము, ఆ తర్వాత స్తుతివలన బలము.


• 2. ఒప్పుదల: స్తుతి అయిన తర్వాత, "నా ఆలోచన, చూపు, వినికిడి, వాక్కు క్రియ, అన్నియు పాపములే" అని నేలమోద ధారపోసి, ఒప్పుకొనవలెను. అప్పుడు భారము దిగిపోవును. ధారపోసిన భారము తగ్గిపోవును.


• 3. తీర్మానము: ఒప్పుదలలో, భూమిమీద ప్రభువుయొక్క పాదములయొద్ద పడిన వ్యక్తి భారముపోయిన మీదట లేచి, తీర్మానము చేయవలెను. స్నానము అయినది గనుక ధైర్యము. చెమట పోయినది, విసుగు పోయినది గనుక చొరవ చేసికొని తీర్మానము చేయవలెను. "యేసు ప్రభువా! నిలువబడుటకు ప్రయత్నము చేయుదును. ఇకమీదట పడను, నిన్ను దుఃఖపెట్టను, ఇకమీదట జాగ్రత్తగా నుందును. నన్ను నేను దుఃఖపరచుకొనను." గెత్సేమనేలో- "శోధనలో పడకుండ ప్రార్ధన చేయుడి అని అన్నావు గనుక జాగ్రత్తగా నుందును అని తీర్మానము చేయవలెను.


• 4. సమర్పణ: సమర్పణ బహు గడ్డయినది. పైన చేసిన తీర్మానము, ఇదియు ఒకటిగానే కనబడును. అయితే సమర్పణ అనగా నా ప్రాణము, నా మనస్సాక్షి నా జ్ఞానము, నా శరీరము, నా ఇంటిలోని వన్నియు, నా సమస్తము నీవే. ఇప్పటినుండి నావే నీవి, నీవన్నియు నావి. నీ సమస్తము నాకు ఇచ్చిన ప్రభువా! నీకే సమర్పించుచున్నాను. ప్రభువా! నీవు నాకేమి చెప్పినా, నేను చేయుదును. చేయవద్దు అని నీవు చెప్పినది మానివేయుదును. ఇది నావల్ల కాదు గాని ప్రయత్నించెదను. "నీకు ఉన్నది సమర్పించు, లేక బీదలకు ధర్మము చేయి, లేదా సువార్త పనికి ఇమ్ము" అని నీవు చెప్పిన యెడల తప్పక చేయుదును. ఈ నా సమర్పణ రిజిస్టేషన్ అయిపోయినది. నాకు కావలసినవి నీవు ఇచ్చెదవు.


• 5. ప్రార్ధన: మన ఇష్టము, దేవుని ఏమైన అడుగవచ్చును. యోహాను14:14 ప్రకారము "ఏమి" అడిగిన ఇచ్చెదనని చెప్పెను గనుక మనము అడుగవలెను. ఏ అంశము అడిగిన ఆటంకము లేదు. పై 4 అంశములు చేయకపోయిన అవి అద్దుగా నుండును. సమర్పణ చేయకపోవుట, ప్రార్ధన నెరవేర్చుటకు ఒక అడ్డుబండగా నుండును. ఇప్పుడు సమర్పణ చేసిన తరువాత దమ్మిడీ అడిగినా, లక్ష అడిగినా ఇచ్చును. ఎందుచేతననగా అడ్డులన్నియు తొలగించుకొన్నాను, గనుక ప్రార్ధన జాబితా తయారుచేసి ఆ ప్రకారము అడుగవచ్చును. యెషయా 7:11. దీనికి అంశ ప్రార్ధన అని పేరు. ఆయన ఇస్తానని చెప్పెను గనుక క్రమముగా ఇచ్చును.


• 6. స్తుతి: అడుగవలసినవన్ని అయిపోయినవి గనుక ఇక స్తుతించవలెను. పై ప్రతి మెట్టు తరువాత స్తుతి చేయవలెను. ఒప్పుదలకు, తీర్మానమునకు, సమర్పణకు, అంశ ప్రార్ధనకు చివర స్తుతి చేయవలెను. తీర్మాన నైజము ఇచ్చినందులకు స్తుతి చేయవలెను. సమర్పణ చేయు ధైర్యము ఇచ్చినందులకు స్తుతి చేయవలెను. అన్ని ప్రార్ధనాంశములు నెరవేర్చిన దేవా! నీకు స్తుతి అని చెప్పవలెను. చివరగా ఆయన దివ్యలక్షణములను తలంచుకొని స్తుతించవలెను.


• 7. కనిపెట్టుట: పై అంశములన్నిటిలో నేను మాట్లాడినాను, ఇక నేను ఊరుకొందును. "నీవు చెప్పు ప్రభువా!" అనునది ఈ మెట్టులో ఉండవలెను. ఇన్ని మనవులు చేసినాను, నీవు ఏమి చెప్పుదువో చెప్పుము. ఈ ఆఖరుమెట్టు సింహాసనము దగ్గరకు వెళ్ళును. గనుక ఇది చాలా ముఖ్యము. ప్రార్ధనలో మనిషి ఆత్మ దేవుని దగ్గరకు పోవలెను. ఇవన్నీ చేసినగాని ఈ ఆఖరు మెట్టుకు వచ్చుటకు హక్కు లేదు. పై ఒక్కొక్క మెట్టులో ఇంకా మెట్టులున్నవి. 1కొరింథి 15:58లో స్థిరత కలిగియుండుడి అని ఉన్నది. గనుక మనోనిదాన స్థిరత కలిగి పై అంశములు చేయవలెను. క్రీస్తు ప్రభువు లేకుండ ఏవియు కలుగలేదని బైబిలులో గలదు. సృష్టికూడ ఆయనను గురించి చెప్పుచున్నది. ఇవన్నియు నేర్చుకొన్నప్పుడు ఈయనే రక్షకుడని చెప్పగల ధైర్యము వచ్చును. ఈయన లేకుండ ఏమియు కలుగలేదు. ఎవరివల్ల సమస్తము కలిగెనో, ఆయననే మనము పట్టుకొన్నాము. సమస్తము కలుగజేసిన ఆయన రక్షకుడు, దేవుడు, మానవుడును ఆయెను. యోహాను 14:14లో "నా నామమున మీరు నన్ను ఏమి అడిగినను నేను చేతును" అని ఉన్నది. అనగా అన్ని నేను చేసినాను గనుక ఏమైన ఇవ్వగలను అని ఈ వాగ్ధానముయొక్క అర్ధమైయున్నది. ఆకాశములోనిదైనను, భూమిలోనిదైనను, పాతాళము లోనిదైనను, సముద్రములోనిదైనను ఆయన ఇచ్చును. ఆయన సమస్తమును కలుగజేసెను గనుక ఆ సమస్తములో ఏదైనను ఆయన ఇచ్చును. కీర్తన 19వ అధ్యాయములో ఆకాశము, భూమి ఉపాధ్యాయులని వ్రాయబడి యున్నది. అనగా అవి ఆయనను గురించి ప్రకటించు చున్నవి. భూమి- నాలో దేవుని జీవముగలదు అన్నట్లు, చెట్లలో జీవము, మృగములలో జీవము, మనలో జీవము, ఆకాశములో వెలుగు; వెలుగైయున్న ప్రభువును చాటుచున్నవి. నేనెప్పుడు వెలుగులో నున్నాను, నేనెల్లప్పుడు జీవమునే కలిగి ఉందునని సృష్టి చెప్పుచున్నది. కాబట్టి దేవుడు
  • 1. కనిపెట్టుట ద్వారా స్వయముగా మాట్లాడుచున్నాడు.
  • 2. సృష్టి వెనుక ఉండి, సృష్టిద్వారా మాట్లాడుచున్నాడు.
  • 3. బైబిలు గ్రంథము ద్వారా మాట్లాడుచున్నాడు.
  
  

  వీటన్నిటి ద్వారా మాట్లాడినను, నరుడు దేవుని నమ్ముట లేదు. వీటిద్వారా దేవుని స్వరము విని స్థిరపడుదుము గాక! ఆమేన్ .